Shillong Naitung 18:
Ka Sorkar MDA-II ka dang pynkhreh mynta ban wanrah ïa ka jingthoh ban ïatai hapoh ka Kynhun Myntri halor ka Uniform Civil Code (UCC) bad na ka liang ka National Law Commission ruh ka la pan jingmut na ka Sorkar Jylla haba ïadei bad kane.
Ka Myntri ba peit ïa ka tnat aiñ, ka Kong Ampareen Lyngdoh ka la ong ba ka jingthoh kaba phah da ka National Law Commission ka la don tangba kam pat ïohi ïa kata, tangba ka Sorkar Jylla kan pynkhreh ban wanrah sha ka Kynhun Myntri ban ïatai ïa kane ka mat.
Kiba bun ki jingpyrshah ki la mih halor ka jingthmu ka Sorkar Pdeng ba ïalam da ka BJP ban pyntreikam ïa ka UCC ha ka ri baroh kawei.
Ka National Law Commission ka la pynjlan ïa ka por ban pdiang ïa ki jingpynsngew bad jingai jingmut halor ka UCC sha ka 28 tarik mynta u Naitung, 2023, na kaba buh por mynshwa tang haduh ka 14 tarik Naitung, 2023.
