Tura, Naitung 18:
Ka TMC jong ka Ri-lum Garo ha ka Sngi Ba-ar ka la pynpaw ka jingsngewkhia halor ka jingsangeh wan poi ki masi sha ka Jylla hadien ba la mynjur ïa kawei ka aiñ kaba pyrkhing ïa kane dang shen ha Assam.
“Ka long kaei-kaei kaba sngewkhia ban ïohsngew ba ka jingwan poi jong ki masi sha Meghalaya ka la sangeh shi syndon naduh ba ka Assam ka la mynjur ïa ka aiñ bad ba la die ïa ka doh muid ha ka jaka jong ka masi. Kane ka la ïalam sha ka jingkiew dor jong ka doh masi bad ka la wanrah jingeh ïa ki nongdie doh ha ka liang ka kam jong ki. Ki ïew-beaiñ die muid ki la sdang ban mih – kaba la ïalam sha ka jingbym biang ha ka khuid ka suba haba ïadei bad ka jingdie doh. Watla kam don jingktah eiei lada bam doh muid, ki paidbah ha kawei ka liang ki don hok ban tip kaei kaba don ha pliang jong ki. Ka seng ki nongdie doh kam shym la seisoh ha ka ban pynbeit ïa kine ki mat bad ka Sorkar, bad i-kumba ka Sorkar kan ym leh eiei halor kane. Ka jingkyrmen ïa ki paidbah ka Jylla ka long tang ban pynkha hi na ki masi ba ki ri bad na bynta ki nongrep ban ïohi ka lad ka lynti hangne bad ka ïew kaba don,” ong u nongïalam seng samla ka TMC, u Richard Marak.
U Marak u la ong ruh ba kam don kaei-kaei kaba rieh ba ka Jylla Assam ka la pyrshang ban pyntreikam ïa ka jingkwah jong ka ha ki nongshong shnong ka Meghalaya la katto-katne por mynta. U la bynrap ba ka rai ba dang shen ban pynsangeh ïa ka jingwan pynpoi masi sha ka Meghalaya ka long kaba thymmai haba khmih ïa u laiñ jingpyrshang uba jrong ban pyni bor ïa ka Meghalaya.
U Marak u la kynnoh ba ka jingthmu jong u Myntri Rangbah ka Assam, u Himanta Biswa Sharma, ka long ban pyrshang ban pynbor ïa ka rukom bam jong u ha ki briew ka Meghalaya, kaba u la pynpaw ba ki long ki bym lah pdiang satia, watla u la kyntu ïa ka Sorkar Jylla ban leh da kaba tyngeh pyrshah ïa kaba kum kane ka jingleh baheh.
“Kaba sngewsih ka long ba imat ba ka Sorkar MDA hapoh ka jingïalam u Conrad K. Sangma kam don budlum haba ïadei bad kane jingpyni bor na ka Assam. Imat ka Sorkar ka kham lah ban shah pynshad ha ka Jylla ba marjan ha ka jaka ban ïeng ïada ïa ki hok jong ki nongshong shnong ka Meghalaya. Ka long ka bym lah pdiang ba ka Sorkar i-kumba ka kham lah ban leh politik ban ïa kaba khmih ïa ki jingdonkam jong ki nongshnong shnong ka Jylla,” u la ong.
“Ngi dawa na ka Sorkar MDA ban leh da kaba tyngeh pyrshah ïa kaba kum kane ka jingtuklar na ka Assam. U Myntri Rangbah u dei ban ïakhun na bynta ki hok jong ki nongshong shnong ka Meghalaya bad ban ïaid shakhmat ban wad ka lad ka ban pynmyntoi ïa baroh. Ka Sorkar ka dei ban trei ban wad ka lad ban pynbeit ïa kane bad ka ban pynmyntoi ïa baroh bad pyntina ba ki briew ka Jylla ki lah ban jied mon laitluid ha ka liang ha shet ka tiew ne ka bam ka dih. Ka Sorkar MDA hapoh ka jingïalam u Conrad Sangma ka donkam ban sangeh ka jingshah pynshad ha ka Assam bad ban ïeng na bynta ki hok jong ki nongshong shnong ka Meghalaya. Ki nongshong shnong ka Jylla ki dei hok ban ïoh ïa kaba paka tam, bad ka la dei por ïa ka Sorkar ban leh ïa ka kam,” u la bynrap.
