Shillong, Naitung 18:
Ka tnat PWD (Roads) lem bad ka National Highways Authority of India (NHAI) ha ka Sngi Balang ki la ai ïa ki kaiphod jong ki ha kaba ïadei bad ka surok na Jowai sha Ratacherra kaba long shi bynta jong ka NH-06.
Ka jingeh, ka High Court ka la kdew, ka dei ha ka surok ba 7 km kaba don hapdeng ka jingjulor bad ka jingbymlong ban ïaid ki kali. Kane ka dei ka surok Jowai Bypass kaba pynïasoh na Thadlaskeiñ sha Mihmyntdu bad ki kali kiba thmu ban leit sha Khliehriat, ki ju pyndonkam ïa kane ka surok khnang ban lait na ka jingleit rung na sor Jowai.
Ïa ki bynta jong ka NH-6 la peit bad maramot da ka NHAI, hynrei dei tang katei ka surok 7 km ba ka jingpeit bad jingmaramot ka shong ha ka PWD (Roads). Ka High Court ka la kdew ba namar ka jingsniew palat jong ka surok, kiba bun ki kali heh ki ju duh noh shiteng lynti katba kiwei pat ki kali ki ju ïaid khongwaiñ noh na sor Jowai ha ka jaka ban ïaid na kane ka Bypass.
Na ka liang ka PWD (Roads) ka la pyni lang bad ki dur ki dar kiba la shon ha ka por ba la maramot ïa katei ka surok Bypass. Ka sorkar jylla ka la ong ba namar jong ka jingwan u slap lyiur ha u Jylliew, ïa ka jingmaramot ïa ka surok la hap ban pynsangeh noh shwa.
Ïa mynta, u juh u kontrakor u pyntrei ïa ka jingmaramot ïa katei ka surok bad la khmih lynti ba yn pyndep ha ka por kaba biang.
“Shiteng na ka lyiur ka la kut bad ha kane ka por, kam long satia kaba biang ban ïaid na ka surok Bypass. Kumba la kdew mynshwa, ka jingshna bad jingmaramot ïa ki surok ka dei ban long katkum ka jinglong ka suiñ bneng na ka daw jong ka jingjur palat u slap ha ka por lyiur, bad ym lah ban ai daw ba ka surok ka la julor tang namar ka jinghap jong u slap ba jur uba neh tang khyndiat por,” la ong ka High Court.
Ka la kyrmen ba ïa ka jingsahteng ban pyndep ïa ka jingmaramot yn sa pyndep hapoh une u bnai bad dei ban maramot biang ïa kito ki bynta ba la julor khnang ba ki kali kin ym hap ban ïaid kyllaiñ sa 30 km eiei namar ka jingbym long ban ïaid na ka Bypass.
Na ka liang u nongmudui u la kdew halor ki jingeh ba la batai da ka NHAI kiba ka sorkar jylla kan hap ban pynbeit. Kum ka nuksa, ka jingdon ki jaka sait kali ka la kiew ha ki State bad National Highway ha ka jylla khlem da don ki nala lane kiwei pat ki jingïada, bad namarkata, ka um kaba mih na kine ki jaka ka tuid sha surok lane ka lang noh shi jaka kaba ktah jur ïa ki surok kham palat ban ïa u slap lyiur.
Ka kaiphod na ka NHAI ka kdew ruh ïa ka jingbym biang ka rukom buh ïa ki pipe um harud surok na Jowai sha Ratacherra, bad ka la don ka jinglait jong ka um na kine ki pipe kaba ktah ïa ki surok.
Ka High Court ka la ong ba ïa kitei ki mat kiba la kdew da ka NHAI dei ban pynbeit da ki bor sorkar bad dei ban buh ruh da ki kyndon na ka bynta ki jaka sait kali ba kynthup ïa ka bai laisen bad kiwei.
Ka ïingbishar ka la ai jingmut ba kan bha lada ka sorkar jylla ka ïashong jingïalang bad ki heh ka NHAI lem bad ki bor distrik khnang ban pynbeit ïa ki jingeh kiba ïadei bad ka surok Jowai-Ratacherra.
