Shillong, Naitung 18:
Kawei ka longkmie ïa kaba la tip kyrteng kum ka Kong Mishon Suting, 65 snem ka rta, ba shong ba sah ha Nongthymmai Raid Mawshun, ka la jah na la ïing ha kaba na ka liang ki bahaïing ki la pyntip ba ha ka 9 tarik Naitung 2023 i la leit sah kai sha ïing ka khun khatduh kaba la poikha ha ka shnong Umden Umbathiang kaba hap hapoh thanat Khapmara ha Umroi.
Katkum ka jingpyntip na ki bahaïing hasem ha ka Sngi Balang, la ong ba katei ka longkmie ka dei kaba don jingduna ha ka bor pyrkhat bad ka la jah naduh ka 16 tarik Naitung, 2023 ha ka por kumba 2:30 nohphai sngi katba i dang thmu ban leit sum ha kawei ka jaka sum kaba don hajan ïing ha ka shnong Umden Umbathiang bad dei naduh kane ka sngi ka khlem wanphai shuh sha la ïing.
Ki bahaïing ki la pyntip ba kane ka longkmie ka la phong da ka jaiñ kyrshah ba jyrngam bad ka phrok ba ïong ha kaba ka jingjrong ka long kumba 5 phut bad u shñiuh uba ïong lam kdor. Ki la kyrpad ïa ki paidbah ba lada don mano mano ba lap ne ïohi ïa kane ka longkmie ba kin sngewbha ban pyntip da kaba phone ha kine ki number (Secretary Shnong Umden Umbathiang – 8787388720, Pyrsa kurim – 6009570155, bad ka khun i Kong Mishon Suting – 8837021564).
