Nongstoiñ, Naitung:
U Additional Deputy Commissioner jong ka West Khasi Hills u Bah HK Thabah u la ong, ka jingduna um bad ka jingjakhlia jong ka um ki long ki ar tylli ki mat kiba kongsan ïa kaba kum ki paidbah ki la ïakynduh bad u la ong ba ka thma ka ban wan nangne shakhmat kan dei ka thma kyrduh um.
Ïa kane, na ka liang u Bah HK Thabah u la pynpaw haba kren kum u kongsan ha ka jingïalang ai jingpynshai halor ka phang ‘Water Resources Data Acquisition System and Hydroinformatic Application’ kaba hap hapoh ka National Hydrology project ïa kaba la pynlong da ka ophis jong u Executive Engineer (WR) Water Resources Division Nongstoin hapoh TRYSEM Hall DC ophis Nongstoiñ ha ka 18 tarik u bnai Naitung 2023.
U Bah Thabah u la pyni nuksa ruh ïa ki katto katne tylli ki Jylla ha ka Ri kiba mad ïa ka jingeh na ka jingkyrduh um ha kaba ki hap ban ïakhun ruh tang ban ïoh ïa ka um. Shuh shuh u la pynpaw ruh ba wat ha nongbah Shillong kala don ka jingkyrduh um ha kiba bun ki bynta bad kane kan sa wanrah jingeh hadien habud lada ym nang ban tyngkai. U la buh ruh ka jingkyrmen ba lyngba kane ka prokram kan ai shibun ka jingmyntoi kumno ban tyngkai bad pyndonkam ïa ka um. Ha kajuh ka por u la kyntu ruh ïa baroh kiba la wan ban ïa shimbynta ha katei ka prokram ba kin ai ka jingïatreilang na ka bynta ban ïada ïa ki tyllong umbam umdih. Shuh shuh ha katei ka sngi, u Bah Risaw Nongphud, EE, WR u la ai ka jingmaitphang kyllum ha kaba ïadei bad katei ka prokram bad u la ïathuh ruh ba ka tnat Meghalaya Water Resources kan pyntreikam ïa ka National Hydrology project kaba dei ka sien jam jong ka Ministry of Jal Shakti bad la ïoh ruh ban pyni ïa ka ‘power point presentation’ halor katei ka phang da u Bah Teibor Marwein, Junior Engineer, WR bad la ïoh ruh ïa ka jingïaphylliew jingmut hapdeng kiba wan ïa shimbynta ha ka prokram.
