Shillong, Naitung 19:
Watla ka jingïaumsnam hapdeng ki Meitei bad Kuki ka la jur bha ha Manipur ha kine ki ar bnai ba la dep, hynrei ki Khasi kiba shong ba sah ha katei ka Jylla ki don hapdeng ka shongsuk shongsaiñ.
Haba ïakren bad u General Secretary ka Khasi Students Union (KSU), samla Donald V. Thabah u la ïathuh ba ki Khasi kiba sah ha Mani-pur ki shongsuk shongsaiñ watla ka jingïakynad hapdeng ki jaidbynriew Kuki bad Meitei ka la poi sha ka jingïaumsnam mar kylliang.
U la ïathuh ba ki Khasi ki shong ki sah ha Khedaghor kaba hap ha Tamenglong District jong ka Manipur bad ki shongsuk namar ki shong ki sah lang bad ki Naga.
U la ïathuh ba ki Khasi ki don palat 1500 ngut kiba sah ha katei ka distrik namar ki im jakpoh da kaba rep kwai bad tymmen bad kiwei de ki kam ba ki trei man ka sngi.
Shuh shuh u la pyntip ba u la ïakren bad ki nongïalam ka KSU ha Manipur halor ka jinglong-jingman ha katei ka Jylla hynrei u la pynpaw ka jingsngewkmen ba ki Khasi ki shongsuk shongsaiñ.
U kyrmen ba ki Khasi kin nang ïai don hapdeng ka shongsuk shongsaiñ namar ka jingïakynad hapdeng kitei ki ar jaidbynriew bad ba ka jinglong-jingman kan sa jai-jai noh katba dang mih ki sngi.
Kumban shu pynkynmaw, ka jingïaumsnam ha Manipur ka la sdang naduh ka taïew ba nyngkong u Jymmang 2023 kat haduh ba ki samla pule na Meghalaya kiba leit pule ha Manipur ki hap ban wanphai noh sha ka Jylla lajong hynrei ki la sdang ban leit bteng ka jingpule hadien ba la kham jai-jai.
