Shillong Naitung 19:
Ka Meghalaya kaba ju ïoh bhah ban phah pule doktor ïa ki samla man u snem sha ki jaka pule kiba don ha kylleng ki bynta jong ka ri, ka lah ban duh noh ïa ka bhah lyngba ka Sorkar Jylla lada ka la paw shabar ba ka Sorkar Jylla ka la ïaid ban tei ïa ka jaka pule doktor hapoh ka Jylla lajong.
Ka Meghalaya ka ju ïoh bhah ban phah pule doktor ha ki jaka kylleng ka ri India lyngba ka Central Pool kaba la mang khnang ïa ki Jylla ki bym pat don Medical College lajong.
Man u snem, ka Meghalaya ka ju ïoh bhah ban phah ïa ki samla ban pule MBBS ne BDS hapoh ngut.
Kine ki samla kiba ïoh bhah lyngba ka jingjied ka Sorkar Jylla ki ju soi ruh ïa ka jingteh kular ba kin wan shakri ïa ka Jylla ynda ki la dep ban pule.
Ka tyllong khubor ka ïathuh ba ka National Medical Commission kaba peit ïa ki Jylla ka ju ai jingmynjur ïa ki dorkar Jylla ban buh ïa ka jaka pule doktor.
Lada ka paw ba ka Meghalaya ka la ïaid ban tei ïa ka jaka pule doktor, ka Jylla kan sa duh ïa ka bhah kaba ju ïoh na ka Central Pool.
Kumba ka long mynta, ka Jylla ka la kham kiew ruh khyndiat ha ka jingïoh ban phah pule doktor ha North Eastern Gandhi Regional Institute of Health and Medical Sciences.
“Ngim pat don ka jaka pule doktor jong lajong haduh mynta, bad ngi dang hap ap ban shaniah ban ïoh phah ïa ki samla pule ban leit sha ki jaka pule doktor,” la ïathuh ka khubor.
Dang shen, ka Myntri ka koit ka khiah ka Kong Ampareen Lyngdoh ka la ong ba ym pat lah ban tei ïa ka Medical College ha Tura bad ïa ka Shillong Medical College kaba dang sahkut la bun phew snem, yn dang pynwandur ha kano ka rukom yn tei ïa ka.
