Khliehriat, Naitung 19:
Hadien ka jingphla jong kawei na ki nongkhaïi drok kaba la shah kem noh na kawei ka ïingwai kaba ha Nongmensong, Shillong, ki pulit ka Khliehriat ki la ïoh ban kem noh sa ïa ki arngut ki nongkhaïi drok kiba dei naka jylla Manipur ha ka nongbah Shillong ha ka jingkhynra kaba la long ha ka 18 tarik mynta u bnai.
U Additional Superintendent of Police, East Jaintia Hills District u Bah B Jyrwa ha ka kyrwoh ba u la phah, u la ong ba kane ka la wan jia hadien ba ki pulit ka Khliehriat ki la wan poi ha Shillong ha ryngkat ka jingïarap ka kynhun ANTF ka East Khasi Hills District bad ki pulit ka thanad Rynjah kila ïoh ban kem noh ïa kitei ki arngut na Shillong bad wanlam shapoh Khliehriat na ka bynta ban leh ïa kaba donkam.
Kine ki arngut kiba la shah kem ki dei kiba la tip kyrteng kum u Khailen Hoakip ba la 42 snem ka rta bad ka Lheineihoi Hoakip kaba la 40 snem ka rta.
Lah ban kdew ba ki pulit ka East Jaintia Hills District, ha ka 16 tarik mynta u bnai ki la ïoh ban kurup ïa u drok heroin uba khia 197.35 gram ba shongdor ha ka ïew ka pyrthei haduh 1.6 klur tyngka hadien ka jingpynap shrip hapoh ka petrol pump ha Nongsning.
Kine ki arngut ki longkmie kiba donkti ki dei kiba tip kyrteng kum ka Hohoi Lhanghal bad ka Ling Haokip kiba wan napoh Silchar sha ka thaiñ Khliehriat da kawei ka Tourist Sumo kaba don ïa u register number MZ04-A-2996.
Dei lyngba ka jingphla jong kine ki arngut kaba la lam sha ka jingshah kem jong kitei kiwei pat, kynthup ïa ka Ngai Rami kaba khot sin Nano na Nongmensong, Shillong.
