Shillong, Naitung 19:
Ki nongtrei ba la shongthait na ka Jaiñtia Hills Autonomous District Council (JHADC) ki khlem pat ïoh ïa ka bai bam tymmen naduh u Nailur 2022.
Kane ka la paw hakhmat ka Meghalaya High Court ha ka Sngi Balang haba ka la shong bishar halor ka mukotduma kaba ïadei bad ka jingbym pat siew ïa ka bai bam tymmen. Kine ki nongmudui ki khlem pat ong eiei ïa kiwei ki jingïoh kiba ki dei hok kum ka DCRG, bad kiwei namar ki kwah shwa tang ba kin ïoh ïa ka bai bam tymmen man la u bnai.
U nongïasaid aiñ ka JHADC u la kdew ba ka jingduna pisa ka JHADC kumba la pynpaw kham mynshwa ka dang long kumjuh, hynrei la pyrshang ban pynbeit ïa ki jingeh ba la pynpaw da ki nongmudui.
Na ka liang ka High Court ka la pynpaw ïa ka jingsngewkhia halor kane ka bynta jong ka jingbymïoh bai bam tymmen namar kane ka dei ka hok bad lada ym siew ha ka por kaba biang, kito kiba ju ïoh ïa ka bai bam tymmen kin mad jingeh. Watla ka High Court ka khlem pat pynwai ïa katei ka mukotduma, ka Court ka la kyntu ïa ka sorkar bad ka JHADC ba kin wad lad ban pyllait noh ïa ka bai bam tymmen kham kloi katba lah.
