Shillong, Naitung 19:
Ki ‘riew paidbah jong ka thaiñ Siejïong bad kiwei de ki shnong kiba hap ha New Shillong ki la pynpaw ba naduh ba dang khynnah ym pat ju jia eiei haba ki bam tit ba kheit na khlaw namar ki la dep ithuh ïa u tit uba bha bad uba sniew.
Kane ka jingïoh ban ïakren bad ki ‘riew paidbah na thaiñ Siejïong ka dei namar ki wan bylla thohdieng ha Umsawli kaba dang shu pynkhyllem ïa ki diengkseh kaba don hajan ka Shillong Indian Institute Management, Umsawli.
Ka jingbuddien u Nongsaiñ Hima ka dei hadien ka jingkhlad noh ki 3 ngut ha kawei ka kamra ba dang shu shna thymmai ha Institute of Bio Resources and Sustainable Development kaba dei ka National Institute of Department of Biotechnology, jong ka Sorkar India kaba don ha Umsawli, New Shillong kaba la buh mawnongrim ha ka 4 tarik Lber, 2019.
Katkum ka jingïathuh ki pulit, kitei ki 3 ngut kiba la khlad ki dei kiba la bam ïa u tit ba ki la leit kheit na khlaw kaba don marjan bad katei ka jaka sah jong ki ha Umsawli.
Kitei ki 3 ngut ki dei kiba la tip kyrteng kum ka Kong Sheba Kharbani (40 snem ka rta), kaba trei kum ka ‘Cleaner’, u Bah Rupert Donbor Dohtdong (43 snem), bad u Blackstar Kharkrang (30 snem). Baroh 3 ngut ki dei kiba shong ba sah ha Mawlai Phudmuri.
Ïa ka metïap jong kitei baroh lai ngut la lap ha ka 9 tarik Naitung 2023 hadien ba la don ka jingsma bad la pyndep ïa ka ‘Post Mortem’ ha ka 10 tarik Naitung 2023 ha NEIGRIHMS Hospital, Shillong.
Nalor ka jingbatai u rangbah bad ki longkmie na shnong Siejiong, la ïoh ruh ka jingbatai shaphang u tit na uwei u rangbah na ki thaiñ Mairang, Eastern West Khasi Hills District uba wan bylla thohdieng ha Umsawli.
Kitei ki nongbylla thohdieng ki la ïathuh ba ïa u tit u lah ban bam na uba mih na khyndew tangba ki dei ban tip kiba sniew ne kiba bha.
Ki la ïathuh ba u tit u sdang mih bha ha u bnai Jymmang bad Jylliew kaba dei ka aïom ba sdang jur bha u slap.
“Sha shnong jong ngi, pat ju bna ban ïap bam tit hynrei kito kiba ïap dei kiba bam ïa u tit buid,” ki la ong.
Ha ka juh ka por, ki la pyntip ba ki don ki briew kiba im sngi ban kheit tit ban die sha kiwei ki briew ban ïoh bai sngi ïalade.
