Shillong, Naitung 19:
U Deputy Chief Executive Member (Dy. CEM) ka Khasi Hills Autonomous District Council (KHA DC), Bah P.N. Syiem u la ong ba ka Executive Committee (EC) shen kan sa wanrah ïa ki aiñ ki ban ïada na ka jingwan rung kyrthep jong ki briew ba nabar.
“Kumba la dawa ki kynhun seng bapher-bapher ba kan don ka aiñ kaba skhem ban tehlakam ïa ka jingrung jong ki bar Jylla, na ka liang jong ngi (KHADC), nga tharai ka la dei kata ka por lehse ngi hap ban ïakren ha ka EC kiei ki lad ki lynti kiba ngi hap ban leh,” ong u Bah Syiem.
Ha kajuh ka por, u la ong ba nalor katei, ka dei ruh ka kamram ka EC ban shna ïa ki aiñ kiba skhem khnang ba ka jingrung jingmih ha ki shnong ki thaw, ki Raid, ki shnat, ki it-ki Hima, kan long katkum ki kyndon aiñ ba la thaw da ka KHADC.
U la ong ba watla ka Sorkar India kam pat ai ïa ka Inner Line Permit (ILP) kumba la dawa da ki kynhun seng bapher-bapher ha ryngkat ka jingmynjur na ka Ïingdorbar thawaiñ ka Jylla, ka KHADC ruh ka ïeng skhem bad dawa ban don ïa ka ILP.
“Watla ngim pat ïoh ïa kata, ka EC kan sa shong shen ban ïakren kiei ki lad ki lynti na bynta ban ïada ïa ka jingrung thurmur ha ki shnong-ki thaw, ki it-ki Hima da ki aiñ jong ka KHADC bad na ki shnong ki thaw, ki Raid, ki Hima kin ym lah ban leh kat kaba ki mon hynrei kin hap bud pyrkhing beit thik katkum ki aiñ kiba ngin sa shna na bynta ban ïada na ka jingrung kyrthep jong kiba nabar,” u la ong .
Shuh shuh haba kylli, u la bynrap, “Ngam don eiei ban ong haba ïadei bad ka jingthmu jong ka Sorkar namar kum u Deputy CEM, nga lah ban kren tang haba ïadei bad ki jaka ba hap hapoh ka jingpeit ka KHADC bad kumba la kren shai da u CEM, ba na ka liang ka EC kan ym lah ban ai ïa ka NOC namarba haduh mynta, kiba bun ki nongshong shnong ka Jylla, la ki long ki shnong, ki Raid ki Hima, ki kynhun seng bapher-bapher, kim pat long la kreh ba ngin ai ïa ka NOC.”
