Shillong, Naitung 19:
Ka Ri India ka la kyndit ha ka Sngi Balang hadien ba kawei ka dur khih (Video) ka la paw pyrthei halor ka jingshah pynïaid lyngkhuit ki arngut ki kynthei ha Manipur.
Katkum ka jingpyllait khubor na ka kynhun Indigenous Tribal Leaders’ Forum (ITLF), la ong ba katei ka jingshah pynïaid lyngkhuit ki arngut ki kynthei kiba dei ki Kuki-Zo ka la jia ha ka 4 tarik Jymmang, 2023, shi sngi hadien ba ka jingïakynad jaitbynriew ka la sdang ha Manipur.
“Ar bnai shiteng naduh ba sdang ka jingïakynad ha Manipur, ki sabut halor ka jingshah ban beiñ ki Kuki-Zo ki la nang ïai paw. Ka ‘video’ kaba la saphriang mynta ka sngi ka pyni ba u paidbhur Meitei u la pynïaid lyngkhuit ïa arngut ki kynthei Kuki-Zo sha kawei ka pynthor ha kaba ki la shah leh be-ijot ha kiba bun ngut,” la kynnoh ka ITLF.
Katei ka kynhun ka la ong ba katei ka la jia ha ka shnong B Phainom kaba hap ha Kangpokpi distrik ha ka 4 tarik Jymmang.
“Ka jingshah leh be-ijot jong kitei ki arngut ki kynthei ka la jia hadien ba ka shnong ka la shah thang bad arngut ki shynrang – uwei uba la kham rangbah bad uwei u khynnah – ki la shah bom ïap ha u paidbhur,” la ong katei ka kynhun.
Ka ITLF ka la dawa na ka Sorkar Pdeng, sorkar Manipur, National Commission for Women bad ka National Commission for Scheduled Tribes ban shimkhia halor katei ka jingjia bad ban leh ïa kaba donkam ban kem ïa kiba donkti.
Ha kawei pat ka liang, ki pulit ka Manipur ki la ong ba ki dang ïaleh katba lah ban kem ïa ki briew kiba la donkti bad katei ka jingjia.
“Ha kaba ïadei bad ka ‘video’ ba pyni ïa ka jingshah pynïaid lyngkhuit ki arngut ki kynthei ha ka 4 tarik Jymmang, 2023, ki pulit ki la pynrung da ka jingujor hapoh ki kyndon kiba ïadei bad ka jingrahbor, jingleh be-ijot da kiba bun (Gangrape), jingpynïap bad kiwei,” la ong ki pulit ka Manipur.
Ki la ïathuh ba ïa ka jingujor la pynrung ha ka thanat Nongpok Sekmai (Thoubal Distrik) pyrshah ïa ki briew bym lah ban ithuh hynrei kiba la kieng atiar bad ka jingtohkit ka la sdang.
