Nongstoiñ, Naitung 19:
Ki bor pynïaid district jong ka West Khasi Hills ha ka sngi Balang ki la leit ban pynpra biang sa 6 tylli ki karkhana thang dewïong beaiñ ha ka thaiñ Shallang ha ki bor District ka West Khasi Hills.
Lah ban kdew hangne ba katei ka jingpynpra jong ki bor District ka West Khasi Hills ïa ki karkhana thang dewïong, ka long da kaba shu pynbthei ïa ki atoskhana jong ki karkhana.
Ka khubor na ki bor District la ong ba kat haduh mynta baroh ki karkhana thang dewïong beaiñ kiba la shah pynpra ki la kot sha ka 22 tylli.
Lah ban kdew ruh ba na ka liang jong ki bor District ka West Khasi Hills ki la buh thong ba ka jingpynbthei bad jingpynpra ïa ki Atoskhana jong kitei ki karkhana saiñ dewïong be-aiñ kan dang bteng bad ban pyndep hapoh 30 sngi.
Shuh shuh ki bor District na ka bynta ka bha ka miat bad ka suk ka saiñ jong u paidbah, la pynjari ïa ka hukum hapoh ka kyndon 144 CrPC kaba la pynmih ha ka 11.07.2023 ban khang pyrshah ïa ka ïaid ka ïeng jong ki paidbah ne kino kino ki kynhun ha ka radius kaba 1 km na ka jaka ba don kitei ki karkhana saiñ dewïong be-aiñ bad la bthah ruh ïa ki paidbah ba kin ïatreilang bad ki bor District katba kane ka kam ka dang ïaid.
