Shillong Naitung 19:
Ki seng saiñ pyrthei ki la shah mana tyngeh ha ki bor pynïaid ilekshon ba nangne shakhmat kim bit shuh ban pyndonkam ïa ki khynnah ban kynhoi ilekshon bad ruh ha ki jaka ïalap ilekshon, ki jingïalang paidbah bad ki jingpyrta ilekshon.
Kane ka jingmana ka la wan lyngba ka byrta kaba la phah dang shen sha baroh ki seng saiñ pyrthei kiba don ha kane Jylla lyngba ka ophis u District Election Officer of East Khasi Hills district.
La mana ba yn sa leh da kaba tyngeh katkum ki kyndon jong ka aiñ lada ki khynnah ki shah pyndonkam na ka bynta ki jingthmu kiba ïadei bad ka ilekshon.
Kane ka jingthoh kaba la phah sha ki seng saiñ pyrthei ka dei halor ka jingïoh jingtip bad jingujor sha ki bor pynïaid ilekshon ba ha kane ka ilekshon MLA, 2023 kaba dang shu dep pynlong mynta u snem, ki seng saiñ pyrthei ki la pyndonkam ïa ki khynnah ha ka por ilekshon ha kaba ïadei bad ka jingïalap, jingïalang paidbah bad jingpyrta ilekshon.
Ki seng saiñ pyrthei kiba la shah mana katkum ka jingthoh kaba la phah ki long ka National People Party (NPP), Indian National Congress (INC), Voice of the People Party (VPP), Hill State People Democratic Party (HSPDP), People’s Democratic Front (PDF), United Democratic Party (UDP), All India Trinamool Congress Party (AITC), Bharatiya Janata Party (BJP), bad Khun Hynñiewtrep National Awakening Movement (KHNAM).
La pynkynmaw ruh ïa ki seng saiñ pyrthei ba kine ki jingbthah kiba maham ban pyndonkam ïa ki khyllung khynnah ha ka por ilekshon ki dei kiba la dep pynmih da ka National Commission for Protection of Child Rights (NCPCR) ha ka 20 tarik Kyllalyngkot, 2017 bad ruh da ka Election Commission of India (ECI) ha ka 21 tarik Rymphang, 2017.
Shuh shuh la ong ba kine ki jingbthah ki long kiba donkam eh khnang ba kan nym jia shuh, khamtam namarba ki dang don ki ilekshon ki ban sa pynlong kum ka ilekshon MDC bad ilekshon sha Ïingdorbar Lok Sabha habu snem 2024.
Kumta katkum kitei ki jingbatai, la bthah ïa baroh ki seng saiñ pyrthei ban pyrkhing bha bad kiar ban pyndonkam ïa ki khynnah na ka bynta ka kam ilekshon, bad lada kim bud, da kaba tyngeh yn sa leh ïa kiba pynkheiñ katkum ki kyndon jong ka aiñ.
