Tura, Naitung 20:
Katto katne ngut ki longkmie ha sor Tura ki la mih sha surok ha ka Sngi Palei ban pyrta “Ampareen Go Back” lane “Ampareen Leit Phai Noh” ban pyrshah ïa ka jingkren jong ka Myntri sorkar ha kaba ïa dei bad ka jingdawa ka ACHIK bad kiwei ban pynlong ïa ka Tura kum ka nongbah ka Meghalaya ha ka por tlang.
Kitei ki longkmie ki la ïeng hajan ka Circuit House ha Tura bad ki la dawa ba ka Kong Ampareen kan leit phai noh na kane ka jaka.
Ki la don ki lad pathai khubor ha kine ki sngi kiba la thoh ba ka Kong Ampareen ka la ong ba ka jingdawa ban pynlong ïa ka Tura kum ka nongbah ha ka por tlang ka long ka bym ïahap satia. Ka la ong ba ka Shillong ka dei ka nongbah bad ïa ki jingdawa ban pynlong nongbah sa ha kiwei ki jaka ym dei satia ban pynsngap.
Ha kawei pat ka liang, ka jingshah thngan ka ACHIK ka la jam sha ka sngi kaba 10 ha ka Sngi Palei.
Ka Kong Ampareen ka don jingthmu ban sah lai sngi ha Rilum Garo da kaba pynlong jingïalang shwa ha Resubelpara ha North Garo Hills. La khmih lynti ba kan pynlong jingïalang ha Tura lashai ka sngi hashwa ba kan mih ban leit sa sha Baghmara.
Da ka jingkhmih ba kan wan poi ha Tura hynne ka sngi, ki katto katne ngut ki nongshong shnong ki la ïa mih sha surok hajan ka Circuit House ban dawa ba ka dei ban leit phai noh. Hynrei haduh ka por ba thoh ïa kane ka khubor, ka Kong Ampareen ka khlem pat poi satia ha Circuit House.
