Shillong, Naitung 20:
Uwei u rangbah u la duh noh ïa la ka jingim hadien ba u la ngam jyllop ha ka wah Simsang namar ka jingïoh kynsan ïa ka ‘cardiac stroke’ katba u dang leit tong dohkha ha katei ka wah.
Kane ka jingjia ngam jyllop jong utei u rangbah uba la don kumba 39 snem ka rta, ka la jia ha ka janmiet jong ka Sngi Ba-ar. Ïa une u rangbah la tip kyrteng kum u Lendrithbirth Ch Marak uba dei na ka shnong Nengkong, kaba don marjan bad ka Siju kaba jngai kumba 20 kilometer na ka nongbah South Garo Hills District.
Katkum ka khubor kaba la ïoh la ong ba une u rangbah u la leit sha ka wah Simsang ban tong dohkha, hynrei u la ngam jyllop ha kawei ka thwei hadien ba sangeh treikam kynsan u klongsnam.
Ïa ka met jong utei u rangbah la lap hadien ba per ha sla um da ki nongshong shnong kiba la pyntip noh mar mar sha ki pulit jong ka Siju.
