Nongstoiñ, Naitung:
Ha ka 19 tarik u bnai Naitung 2023 ka Estimate Committee jong ka Ïingdorbar Thawaiñ ka Jylla kala hiar ban jurip ïa ka jaka pule ka Polytechnic kaba don ha ka shnong Mawrusyiar jong ka sor Nongstoiñ ha kaba ka jingtrei mynta kala sahkut la bun bun snem kata naduh ba la sdang ha u snem 2017.
Ïa ka jingjurip ha katei ka sngi la ïalam da u Bah Mayralborn Syiem, MLA kum u Chairman, ryngkat ka jingïadon lang ki MLA kiba long ki dkhot ka committee, u MLA ka Nongstoiñ Bah Gabriel Wahlang, u MLA ka Rambrai Jyrngam u RG Momin, u Deputy Commissioner ka West Khasi Hills, ki ophisar na ka tnat Pule Puthi bad na ka tnat PWD Building.
Ka jinghiar jurip ka long ban peit bad khmih bniah ha kaba ïadei bad ka jingsahkut jong ka jingtei ïa katei ka jaka pule mynta da ki snem.
“Kum ka committee ïa kaba ka sorkar kala shaniah ha ngi ba ngin buddien khamtam ha kaba ïadei bad ki projek kiba sahkut, la ka long ha ka liang ka pisa, ka jingbym biang ka mang tyngka, ngi wan hangne ruh na ka bynta ban pynthikna ba kane ka jingtei ïa ka polytechnic kan dei ban ïaid beit kam dei ban sangeh kata ka dei ka jingthmu,” ong u Bah Mayralborn haba kren sha ki lad pathai khubor.
U la ïathuh ruh ba ka jingsahkut jong katei ka projek, ka dei namar ka jingduna ban pyllait ïa ka pisa na ka sorkar pdeng lyngba ka Ministry of Human Resource Development.
Shuh shuh u la ong ruh ba ka kamram jong ka committee ka long ban shimkhia ïa kane ka kam ban buddien la yn nang ïoh biang ïa ka pisa ne ka ‘fund’ na ka ministry ne na ka sorkar Jylla na ka bynta ban ïaleh katba lah ban pyndep ïa kane ka jingtei ïa ka polytechnic ha Nongstoiñ na ka bynta ka jingmyntoi ki paidbah nongshong shnong.
U la ïathuh ruh ba ha katei ka jaka pule ki don ki ar tylli ki trade ne ki bynta jong ka jingpule kiba la pyrshang ban buh na ka bynta ka jingmyntoi ki samla ki ban ïoh pule ki ban ïeng ha la ki jong ki kjat bad kan long ka jingmyntoi ïa ka ïoh kam ïoh jam.
Shuh shuh ha kajuh kane ka sngi kane ka committee kala leit ruh ban jurip ïa ka ïing skul kaba thymmai jong ka Sib Singh Memorial Govt. Higher Secondary School kaba haduh mynta ym pat shym la lah ban pynbiang ïa ki jingdonkam.
