Shillong, Naitung 20:
Ki pulit ka Shillong Traffic Police (STP) ki la ïoh ban bat haduh 755 tylli ki kali kynthup ki ar shaka kiba la pynkheiñ ïa ki kyndon aiñ bad la ïoh ruh ban daiñ kuna haduh T.7,68,900 tang ha u Naitung, 2023.
Kane ka jingïoh bat ïa kine ki kali bad daiñ kuna, ka la long hadien ba ki kali bad ki ar shaka ki la pyndait da ki ‘silencer’ kiba la thaw khyllah kaba wanrah ïa ka jingsawa kaba jam bha bad kaba la pynthut bad ktah shi katdei eh ïa kiba ïaid ba ïeng, ki nongdie dukan bad wat ïa kito kiba don ki ïing harud surok.
Ha ka kyrwoh ba la pyllait da u Superintendent of Police (SP), East Khasi Hills, Bah Sylvester Nongtnger, la ong ba dei halor katei ka mat ba na ka liang jong ki pulit pynïaid kali ka nongbah Shillong ki la pynlong ka jingtalasi bad bat ïa ki kali bad ki ar shaka kiba pyndait ïa ki silencer ba la thaw khyllah.
“Ha Shillong, ka Shillong Traffic Police (STP) ka la ïoh ban bat ïa ki kali ba pyndait ïa ki silencer khyllah bad la lap ba don haduh 755 tylli ki case bad la ïoh ruh ban daiñ kuna haduh T. 7,68,900,” la ong u SP.
Shuh shuh u la pyntip ruh ba ki pulit ki la bat haduh 17 tylli ki kali kiba pyndait ïa ki silencer khyllah bad la pynsaja ïa ki katkum ki kyndon jong ka aiñ.
Ha kaba ïadei bad kane, ka Shillong Traffic Police (STP) ka la kyntu ïa ki paidbah bad ki trai kali ban kiar na ka jingpyndait ïa ki silencer khyllah namar kane ka long pyrshah ïa ka Motor Vehicle Act bad ïa kiba leh pyrshah ruh yn pynshitom katkum ki kyndon jong ka aiñ.
