Nongstoiñ, Naitung 20:
Ka Hynñiewtrep Youths’ Council (HYC), West Khasi Hills District ka la dawa na ka sorkar jylla ba kan ithuh ne pynlong noh ïa ka Nongstoiñ kaba dei ka nongbah jong ka West Khasi Hills District kum ka nongbah por pyrem.
U General Secretary ka HYC, West Khasi Hills samla Wanteibok Lyngdoh u la ong, lada ki paralok Garo ki kwah ban pynlong noh ïa ka nongbah Tura kum ka Winter Capital, kan eh aïu ban pynlong ïa ka Nongstoiñ kum ka ‘Spring Capital’.
Shuh shuh u la ong ruh ba ka West Khasi Hills District ka la kynjoh mynta 46 snem naduh ba la thaw ïa ka. Ka dei ka district kaba la pynmih thymmai ïa ar tylli kiwei pat ki district ba kynthup ïa ka South West Khasi Hills bad ka Eastern West Khasi Hills District. Kane ka district ka la pynmih ïa shibun ki khlawait bad riewkhraw ka jylla, hynrei haba phai pat ha ka liang ka roi ka par, kane ka district ka dang duna haduh katta katta.
Kumta ka seng ka la dawa ïa ka sorkar jylla ba kan pynlong noh ïa ka Nongstoiñ, West Khasi Hills District kum ka nongbah por pyrem khnang ban lah kyntiew ïa ki kam pynroi ha kiba bun ki liang.
