Shillong, Naitung:
U Myntri Rangbah ka Jylla Conrad K Sangma ha ka sngi Nyngkong, u la hiar jurip ïa ka surok bala shna pynheh ba pynïasoh ïa ka Mairang-Ranigodown-Azra, Assam, kaba dei ka surok kaba kongsan bha bad kaba shakri kum kawei pat lynti ïaid ban poi sha nongbah Guwahati bad ka kad liengsuiñ Guwahati lyngba ka Mairang.
Ka surok Mairang-Ranigodown-Azra kan dei kawei pat ka surok ka ban pynïasoh ïa ka Eastern West Khasi Hills bad ka Ri-Bhoi District shaduh sha kad liengsuiñ Guwahati bad ruh sha nongbah Guwahati. Kane ka surok ka long kaba kongsan bha lada jia ryngkat ba jur ka dheng kali ne shah khang lynti ïa ka surok NH-6 ba pynïasoh ïa ka Shillong sha Guwahati.
Haba kren halor ka surok, u Myntri Rangbah u la pynkynmaw ïa ka por ba u dang dei u nongïalam ka Liang Pyrshah ha ïingdorbar thawaiñ ka Jylla ha u snem 2010-2011 kaba u la ban jur ban tei pynbha ïa kane ka surok khnang ban pynsuk ïa ka leit ka wan.
“Nga kynmaw ha u 2010-2011, ha ka por ba nga dang long u nongïalam ka liang pyrshah, nga la kren ïa kane ka surok bad nga la kyntu ïa ka Sorkar ha katei ka por ba kan trei pynbha ïa kane ka surok namar ka Jylla ka donkam sa kawei pat ka surok ba pynïasoh sha Assam,” u la ong hadien ba dep jurip ïa ka surok, kaba la dep ban trei pynheh mynta.
“Ha u snem 2018, haba thaw Sorkar ma ngi, ngi la shimkhia bha ïa ka projek ban pynheh bad pynbha ïa kane ka surok. Nga kmen palat ban ïohi ba kane ka surok kala dep mynta. Kane ka dei ruh ka jingkular ba ngi la ai sha ki paidbah ha ka por ilekshon bad ngi la lah ban pyndep ïa kane ka surok mynta,” u la ong.
Halor ka jingkongsan ka surok bad ki jingmyntoi ba kan ai ïa ka Jylla, u Myntri Rangbah u la ong, “Kumba phi ïatip, ka jingpynïasoh surok ka dei ka jingplie lynti ïa kano kano ka kam pynroi ba kan wan, mynta ba kala dep, kane ka surok kan plie ïa shibun ki lad ba ki kam khaïi pateng kin jia, ka lad ban kyntiew ïa ka kam jngohkai bad ruh ha kiwei ki kam ba kin mih”.
U Myntri Rangbah u la pyntip ruh ba ki Satellite Cities kin sa mih ha kane ka surok ha ki snem ban sa wan, ki ban long marjan ka nongbah Guwahati bad ka Kad Liengsuin. “Naba kane ka surok ka lam beit beit sha kad liengsuiñ bad sha nongbah Guwahati, kumta ka jaka bad ki thaiñ ba marjan ka Guwahati bad kad liengsuiñ kin sa ïohi kham bun ki kam pynroi ha ki snem ban sa wan namar ngin hap ban pynmih ïa ki satellite cities ha kaba ngin lah ban pynkha ïa ki Zone bad ka jingdon marjan ka Guwahati kan dei ka kabu ïa ngi,” ong u Myntri Rangbah.
Haba pynpaw ïa ka jingsngew hun halor ka jingtei pynheh ïa ka surok, u Myntri Rangbah u la pynkynmaw ïa ka jinglong kongsan na ka bynta ka Jylla bad ki nongshong shnong. U la ong, “Haba nyngkong, ka dei ka jingpynïasoh sha ki paidbah, kaba ar ka dei ka lad kamai kajih ka ban sa plie lynti ym tang ïa ki paidbah ka thaiñ hynrei jong ka Jylla baroh kawei bad kaba lai bad ba kongsan eh ka dei ba kane ka surok kan shakri kum kawei pat ka lynti ïaid sha East Khasi Hills bad sha kiwei ki bynta jong ka Meghalaya”.
