Shillong, Naitung 20:
U Myntri Rangbah ka jylla, Conrad K Sangma u la ong ba ka jingïakren ïasuk hapdeng ka seng Hynñiewtrep National Liberation Council (HNLC), ka Sorkar Jylla bad ka Sorkar Pdeng ka dang ïaid shakhmat bad na ka liang jong baroh kiba don bynta ha kane ka kam ki don ïa kajuh ka jingmut kata ban poi sha ka thong.
Haba kren sha ki lad pathai khubor hadien ba la wai ka jingïalang jong ka kynhun Myntri kaba la long ha ka sngi Palei, u Myntri Rangbah u la ong ba ka jingïakren bad ka seng HNLC ka long da ka jingmut jingpyrkhat kaba kylluid bad ka jingïakren ka long beit ban poi sha ka jingïasuk bad ban pynbeit noh hapoh ka jingïakren katkum ka riti synshar bad katkum ki kyndon.
U Myntri Rangbah u la ong ba watla kin don shibun ki jingeh hangne hangtei ha ka jingïakren ïasuk, hynrei na ka liang ka sorkar Meghalaya ka la skhem jingmut ban pynïaid shakhmat ïa kane ka kam. Ka sorkar jylla ka la shim ruh ïa ki sienjam ba lada don kino kino ki jingartatien, ka sorkar kan ïaleh ban weng ïa kitei ki jingeh hapdeng ka HNLC bad ka sorkar pdeng.
“Ngi dang khmih, kam dei tang ka sorkar jylla hynrei ngi hap ban sngewthuh ba ka jingïakren bad ka tnad kam pohïing ka sorkar jylla ruh ka don bynta lang, kumta ngi hap ban sngap lem ïa ka jingai jingmut ka jong ki,” la ong u Myntri Rangbah.
Ha kaba ïadei bad ka mat jingdawa mab ka HNLC ïa ki mukotduma pyrshah ïa ki dkhot jong ka seng, u Myntri Rangbah u la ong ba ka sorkar jylla bad ka tnad kam pohiing ka sorkar India kan dang khmih bha bad ïakren bha shwa halor katei ka bynta.
