Shillong, Naitung:
Kum shi bynta na ka jingkynmaw burom kyrpang ïa u khlawait ka Ri bad ka jaitbynriew, u Tirot Sing Syiem ha ka Lah Sngi U Blei, ka seng United Hynñiewtrep Movement (UHM) ka la leit ban buh syntiew ha u mot dur jong u Tirot Sing ba don ha u Soso Tham Auditorium.
Haba ai jingkren ha katei ka sngi, u President jong ka seng, u Bah Charlie Johnson Rani u la ong ba ka kyrwoh sha ka Jaitbynriew lyngba ka UHM ka long ba kum ki sengbhalang kin ïai ïaleh na ka bynta ka dawbah jong ka jaitbynriew kumba u Syiem Tirot Sing u ba dei u khlawait ka ri u la prat lynti na ka bynta ka dawbah dawsan jong ka Jaitbynriew.
“Ngi kum ka seng baroh kawei, ngin ïai ïeng na ka bynta ka bha ka miat, ka khia ka shon bad ka kit ka shipa jong ka jaitbynriew baroh kawei,” la ong u Bah Rani.
U Bah Rani u la phah ïa u kyrwoh ruh sha ka jaitbynriew ha kaba u la kyntu ba kum ka jaitbynriew ka dei ban ïa long tylli noh kawei bad ba kam dei shuh ban don kano kano ka jingïatan tyllai ne ka jingïapeit matdong iwei ïa iwei bad kum ki para sengbhalang kiba don hapoh ka bri u Hynñiewtrep Hynñiewskum ki dei ban ïa long kawei. “Ha kajuh ka por ruh ngin ïa ieid, ngin ïa kdup bad ngin nym don kano kano kata ka jingwoh ñia iwei ïa iwei,” la ong u Bah Rani.
Shuh shuh u Bah Rani u la ong ba ka jingthrang jong ka seng ka long ba ka sorkar ka dei ban sngap noh ïa ki mat jingdawa jong ki sengbhalang kaba kynthup nyngkong eh ïa ka jingdawa ban pyntreikam noh ïa ka Inner Line Permit (ILP), kaba ar ka long ka jingdawa ban pynrung noh ïa ka ktien Khasi ha ka khyrnit kaba phra jong ka Riti Synshar ka Ri India bad kaba lai ka long ban ithuh noh kyrpang ïa ki Khasi lyngba ka Instrument of Accession (IoA) kaba la don bad kaba la ïateh kular hapdeng ka sorkar bad ka Dominion of India naduh ki spah snem kiba mynshwa kata naduh ki snem 1947-1948 ter ter.
U Bah Rani u la ong ba ka sorkar ka dei ban sngap ïa ka sur jong ki seng kiba la ïeng ryntih lang ban kyntu ïa ka sorkar ba kam pat dei ban pyrkhat ban wanrah ïa kata ka lynti rel hangne hapoh ka Ri Khasi jong ngi katba ki aiñ kiba biang bad kiba don bniat kum ka ILP lane ka MRSSA kiba biang, ka sorkar kam pat lah ban pyntreikam.
“Ngin ïai pyrshah bad ngin nym ailad hi ruh ïa kane ka sorkar ba kan wanrah ïa kum kita,” la long u Bah Rani.
