Shillong, Naitung 20:
Ki nongdie tit harud surok ban leit sha NEIGRIHMS Hospital, Mawdiangdiang kaba dei ka lad ban kiew sha shnong Mawpat ki la pynpaw ka jingduhnong namar ki paidbah kim shym la nud shuh ban thied ïa ki tit ba ki die naduh ba lai ngut ki briew ki la khlad ha jaka sah ha Umsawli tang namar ba ki bam ïa u tit buit.
Kine kiba die ïa u tit uba bha ki don kumba lai tylli ki dukan kiba shu shong madan harud surok kiba la shu song ïa ki jait tit ha kawei-pa-kawei ka sla.
Ka jingbuddien U Nongsaiñ Hima ka dei hadien ka jingkhlad jong lai ngut ki briew ha kawei ka kamra ba dang shu shna thymmai ha Institute of Bio resources and Sustainable Development kaba dei ka National Institute of Department of Biotechnology, jong ka Sorkar India kaba don ha Umsawli, New Shillong kaba la wan buh mawnongrim ha ka 4 tarik Lber, 2019.
Katkum ka jingïathuh ki pulit kine lai ngut kiba la khlad ki dei kiba la bam ïa u tit kaba ki la leit kheit na khlaw kaba don marjan bad katei ka jaka sah jong ki ha Umsawli.
Kine lai ngut ki dei kiba la tip kyrteng kum ka Kong Sheba Kharbani 40 snem ka rta, kaba trei kum ka cleaner, u Bah Rupert Donbor Dohtdong, 43 snem, bad u Blackstar Kharkrang 30 snem. Baroh lai ngut kidei kiba shong ba sah sah ha Mawlai Phudmuri.
Kine kiba die ïa ki tit harud surok ki la ïathuh ba ki la die tit la slem bha, hynrei ym shym la don mano mano ba jia jingsngewsih namar ki la ithuh ïa u tit uba bha haba ki la leit kheit na khlaw.
Ki ïathuh ba ki leit kheit tit haduh Thangshalai, Mawryngkneng, don ki por ba ki ïatyngkhuh para nongwad tit.
“Ngi nang ban jied ïa ki tit kiba bha.. ka dei ba la hikai da i meiieid na ki por mynshuwa bad hiar pateng haduh ha ngi ki khun” ki la ong.
Shuh shuh ki la pyntip ba lada kim lah ban die hapoh ar sngi ki hap ban bret noh namar kim long shuh.
Ki la pyntip ruh ba u tit u sdang ban mih naduh u bnai Jymmang, Jylliew bad don ki tit kiba mih haduh u bnai Risaw
“Lada ka aïom mih tit ka la kut, ngi la hap ban leit bylla da kiwei ki kam” ki la ong.
Kumta ki la kyntu ïa ki paidbah kiba ju bam ïa u tit kaba ki ju thied na ki man ka por kim dei ban don jingartatien namar ki die ïa u tit uba bha.
Ha kajuh ka por ki la kyntu ïa kito ki briew kiba kwah bam tit nai leit kheit kulmar sha khlaw lada kim pat da ithuh bha, hynrei kin shu wan thied ïa u tit ba ki die ma ki ha ka dor kaba tang shispah tyngka shi song.
