Shillong, Naitung 20:
Ka Kynhun Myntri ka Sorkar Jylla ka la ai jingmynjur ïa ki 5 tylli ki mat kiba la wanrah ban ïatai ha ka jingïalang kaba la pynïaid da u Myntri Rangbah, u Conrad K Sangma ha Secretariat ha ka Sngi Palei.
Ki mat ba mynjur da ka Kynhun Myntri:
•Ka Sorkar kan thied 50 akar ka jaka ha thaiñ Nongmahir, Ri Bhoi District ban tei ïa ki jingtei jingshna ban kyntiew ïa ka kam jngohkai.
•Da shipiah pynkiew ïa ka dor jong ka umphniang kali.
•Dei ban siew ïa ki khajna Value Added Tax (VAT) hapoh 30 sngi, ym shuh hapoh 100 sngi.
•Ngat siew khajna sha ka Sorkar ki ar shaka kiba ju kamai khlem aiñ baroh shikatta.
•Yn pyndam noh ïa ka skulbah shimet kaba kyrteng ka Rajat Lal University.
Haba ïathuh ïa ki rai sha ki lad pathai khubor hadien ka jingïalang jong ka Kynhun Myntri, u Myntri Rangbah u la ïathuh ba ka Kynhun Myntri ka la mynjur ban thied jaka ban tei ïa ki jingtei ban kyntiew ïa ka kam jngohkai ha shnong Nongdiengngan kaba don ha Nongmahir Lake, Ri Bhoi District.
U la ong ba kane kan ïarap ïa ka Sorkar ban kham kiew ha ka jingdon jaka ha kaba yn lah ruh ban tei ban shna ïa ki projek ki ban kyntiew ïa ka kam jngohkai khamtam hajan ka pung Nongmahir kaba long ka jaka kaba itynnat bad khring ïa ki nongjngohkai.
Ka Kynhun Myntri ka la mynjur ruh ban pynkiew ïa ka dor jong ka umphniang kali diesel da shipiah (50 pisa), bad u Myntri Rangbah u la ong ba ka jingïapher ka dor ka umphniang kali ka long T.6.23 hapdeng ka nongbah Guwahati bad ka dor ka umphniang ha Khanapara kaba hap ha Meghalaya. U la ong ba ka diesel ka long T.90.33 shu litar ha Guwahati katba ka dor ka long T. 84.10 shi litar ha Khanapara. Kumta u la ong ba ka Jylla ka shim kabu ïa kane da kaba pynkiew ïa ka dor ka umphniang kali ha Jylla da shipiah (50 pisa).
U la ong ba da kaba pynkiew dor shipiah ïa ka umphniang kali, ka jingïoh lum pisa ka Sorkar Jylla kan kham kiew kumba T.5 klur ne T. 6 klur na kaba ju ïoh lum baroh shikatta.
Ka Kynhun Myntri ka la mynjur ruh ïa ka jingpynbeit thymmai ïa ka por ban siew khajna Value Added Tax (VAT) sha ka Sorkar halor ka kyiad, petrol bad diesel. Ka por ban siew ïa ka VAT sha ka Sorkar baroh shikatta ka dei hapoh 100 sngi lane 3 bnai, hynrei mynta la buh ban siew noh hapoh 30 sngi.
Shuh shuh u Myntri Rangbah u la pyntip ba ka Kynhun Myntri ka la ai jingmynjur ruh ban pyndam noh ïa ka aiñ haba ïadei bad ka jingseng ïa ka skulbah shimet kaba tip kum ka Rajat Lal University da kaba pynduh pyndam noh ïa ka Rajat Lal University Act, 2011. La ong ba kane ka skulbah wat hadien ba la mynjur u Lat ha u snem 2020, ki bor pynïaid kim shym la leh eiei ban pynïaid shakhmat ïa ka kam, bad haba ki bor ba dei peit ïa ki skulbah shimet ki la pan jubab, hynrei ym shym la ïoh ka jubab ka ban pynhun na ki nongpynïaid.
Ha kawei pat ka liang, ka Kynhun Myntri ka la ai jingmynjur ruh ïa ki ar shaka kiba ju kamai khlem siew khajna sha ka Sorkar ba kin kamai da kaba siew ïa ka bai laisen bad permit.
Ki ar shaka kin ngat ha ka kyndon aiñ kaba tip kum ka Meghalaya Taxi Aggregator Operation Rules, 2020 ha kaba na bynta kawei ka ar shaka, u nongñiah un hap ban siew kum ka bai laisen kaba long T.700 shisnem, katba ka bai permit ka long T.200 shisnem lada ki kamai tang ha ki jaka kiba la batai lypa kum ha nongbah ne district, hynrei lada kamai ha baroh kawei ka Jylla, ka bai laisen ka long T.1300 bad ka bai permit ka long T.200.
Ka dor kaba dei ban oh lada shong da kine ki ar shaka ka long T.10 man ka 1 km, bad lada tam ka kilometre, yn kheiñ T.5 man la ka kilometre kaba tam bad lada phah ap, yn oh dor T.4 tyngka man ka 5 minit.
Kine ki ar shaka kiba kamai ki dei ruh ban don GPS, hap ban pynrung kyrteng, ban pyni kyrteng jong ki nongñiah na ka bynta ka jingshngaiñ ki nongshong ar shaka.
