Nongpoh, Jylliew 20:
Ha kawei ka jingjia ïatyngkhuh kali ha ka janmiet jong ka sngi Palei, lai ngut ki briew ki la mynsaw ba kynthup ïa kawei ka longkmie bad ar ngut ki heprit. Kane ka jingtyngkhuh kali ka la jia ha ka jaka phai kali (diversion) jong ka surok bah National Highway-6 mar pyrshah bad ka shlem treikam u Deputy Commissioner ka Ri Bhoi District ha Nongpoh ha ka por kumba 3 baje eiei.
Katkum ka tyllong khubor ba la ïoh lum, la ïathuh ba katei ka jingtyngkhuh kali ka dei hapdeng ka Maruti 800 kaba don ïa u number ML05-K-0723 pyrshah bad ka Grand Vitara kaba don ïa u number ML10-E-2007.
La ïathuh ba katei ka kali Grand Vitara ka dei kaba dang wan kiew sha Bethany Hospital Nongpoh na ki thaiñ Byrnihat. Hynrei mar ïa poi ha katei ka lad jong ka shlem treikam u Deputy Commissioner, ka la ngat noh ha katei ka jingtyngkhuh kali pyrshah ïa ka Maruti 800 kaba dang thmu ban jam sha shiliang jong ka surok bah.
Ha katei ka jingtyngkhuh kali, la ïoh jingtip ba lai ngut ki briew ba kynthup ïa ar ngut ki heprit bad ka kmie kiba shong hapoh ka Grand Vitara ki la mynsaw. Kumta la pynkit noh ïa ki sha ki jaka ai jingsumar, katba ym shym la don pat kiba mynsaw kiba shong hapoh ka kali Maruti 800.
Halor kane ka jingjia, na ka liang ki pulit ka thanat Nongpoh ki dang pynlong ïa ka jingtohkit ban lap ïa ka daw tynrai halor katei ka jingtyngkhuh kali. Kitei baroh ar tylli ki kali kiba ngat ha katei ka jingjia ruh la rah noh sha thanat.
