Shillong, Naitung 20:
Namar ka jingïatan tyllai ban pynkylla kum ka Shillong Medical College ne ban wanrah da ka Tuberculosis Hospital ha Umsawli, New Shillong, ka jingtei kaba la dep shna mynta la saw snem ka la shu sah khongreng khlem pat lah ban pyndonkam ban ai jingshakri ïa ki paidbah.
Ka jingsah khongreng ki kamra kiba la dep shna da ka tnat ka koit ka khiah jong ka sorkar jylla ha Umsawli kaba hap ha shnong Mawpat, ka la long kumba pynsep ei ïa ka pisa u paidbah. Kane ka long namar ki don ki kamra kiba ki jingkhang dieng ki la sdang pyut, nangta ka mala ba la dep tei ki la sah khongreng bad mih satang ki phlang bad ki ñiut ki ñier kiba la ker tawiar khlem don nongsumar.
Ha ka jingjurip U Nongsaiñ Hima ïa katei ka jaka la lap ba ka surok kaba la shna hapoh katei ka jaka sumar ki la jan tap da ki phlang.
La ïohi ba ka sorkar ka la dep pynbiang ïa ki bording ban ai jingshai lada dei hapoh ïing ne ki jingshai ba la pynthaba na ka jingkhlaiñ jong ka sngi, nangta ka umbam ruh ka la poi lut.
Hynrei ynda la poi ha katei ka jaka, hakhmat jong ki kamram jong katei ka jaka sumar ka sorkar jylla ka dang thoh ba ka dei ka jaka ba dang sumar ïa kiba pang Covid-19 katba bun na ki kamra ki la dep khang tala.
Ka jingbym lah ka sorkar ban pyndonkam ïa katei ka jaka kaba don kumba 6 akar ka dei namar ha kaba nyngkong ka jingthmu ban wanrah noh ïa ka TB Hospital na Mawprem sha Umsawli. Hadien ba la dep, ka la don ka jingthmu ban wanrah noh da ka Shillong Medical College, hynrei da ka jingïatan tyllai ka jingduhnoh ka long ïa ki paidbah namar kim ïoh jingmyntoi shuh.
Haba ïoh ban ïakren bad u Myntri barim ka tnat ka koit ka khiah ka sorkar jylla, Bah A.L Hek uba dei ruh u Myntri ka sorkar jylla uba bat mynta ïa ka tnat ri jingri u la ong ka jingtei ïa ki kamram (Building) ha Umsawli, New Shillong ka la dep lut nadong shadong.
U la ïathuh ha ka por ba u long Myntri ha ka tnat ka koit ka khiah ka jingthmu ka long ban wanrah ïa ka TB hospital sha Umsawli. Hadien pat ka la don ka jingïakren ban pynkylla noh sha ka Shillong Medical College ne Medical Hospital, hynrei katba dang ïakren bad ki riewshemphang, haba la wan shimti noh u James Sangma kum u Myntri ha kito ki por u la pynduh noh ïa ka Shillong Medical College bad sah khongreng haduh mynta.
U la ong ban pyndonkam ïa katei ka jaka ha Umsawli ka shong sa ha ka kti jong ka Kong Ampareen Lyngdoh kaba dei ka Myntri kaba dang bat thymmai kumno ba kan leh.
U Bah Hek u la ïathuh ba ka Tura Medical College haduh mynta ka jingtei ïa ki kamra kam pat dep lut, hynrei u pynpaw ka jinglyngngoh kumno u Myntri barim u weng noh ban wanrah ïa ka Shillong Medical College.
Ha ka juh ka por u la kyntu ïa ka sorkar kaba la ïalam da u Conrad K Sangma ba kan pyntreikam noh ïa kitei ki kamra kiba la dep shna lada dei ha kano kano ka bynta khnang ba kin nym sniew kitei ki kamra kiba la dep shna.
Namarkata, u don jingkyrmen ba lada la pyndonkam ïa katei ka hospital kaba la shna ha Umsawli ka jingmyntoi kan long ïa ki paidbah ka thaiñ Mawpat bad ïa ka jylla baroh kawei namar ka surok, ka bording, ka um ki la biang lut.
