Shillong, Naitung 20:
U Myntri Rangbah, Conrad K Sangma u la pdiang ïa ki jingduna kiba kum ka Jylla ka hap ban ïaid lyngba ha kaba ka hap ban ïakhun ïa ki jingeh bad diengpyngkiang, bad u la ong ba da kaba pdiang ïa kita ki jingduna, ki jingkylla kin sa wan ha ka Jylla.
U Myntri Rangbah u la pynpaw ïa kane haba jubab ïa ki jingkylli halor ka jingpaw ka Meghalaya ha ka thup ki Jylla baduk ha India.
U la kubur ba ki don shibun ki diengpyngkiang ha ka jingpyrshang ban trei na ka bynta ban kyntiew ïa ka Jylla ha ki liang baroh. Hynrei da kaba pdiang ïa ki jingduna kiba kum ka Jylla ka don, yn sa lah ban thawlad ban wanrah ki jingkylla.
U la ai nuksa ïa ka jingai injek ha kaba ka Meghalaya ha u snem 2018 ka don shatrai napdeng ki Jylla, hynrei da ka jingshim ïa ki sienjam ka Jylla ka la lah ban wan shakhmat bad long ba-ar tang hadien khyndiat snem.
U la kdew ruh ïa ki jingeh kiba ka Jylla ka mad ha ka jingpynbiang ïa ki lad jingsumar ha kaba la sakhi ïa ka jingbun ka jingkhlad ki longkmie bad khyllung, hynrei lyngba ki lad bad ki sienjam kiba ka Sorkar Jylla ka shim, la lah ban pynduna ïa kata.
U Myntri Rangbah u la ong ruh ba ka Sorkar ka la shim ki sienjam ban pynpoi ïa ki kam pynroi lyngba ki prokram bapher bapher sha nongkyndong bad kumjuh ki prokram na ka bynta ki nongrep ban nang kyntiew ïa ka ïoh ka kot.
U la ïathuh ba ka Sorkar Jylla ka la pynkiew ruh ïa ka rukom pynlut ha ki kam pynroi ha ka Jylla bad kine ki jingpynlut ki ai jingmyntoi ïa ka Jylla hi baroh kawei.
U la ong ba ym lah satia ban ong lada dei ba ka rukom lum jingtip ban sngewthuh shaphang ka jingduk ha Jylla la leh naduh ki shnong ne thaiñ nongkyndong namar ka Sorkar ka la ïaleh ban phaikhmat sha nongkyndong ban kyntiew ïa ki kam pynroi.
“Kum ka Jylla ngin sdang ban pdiang ïa kita ki jingduna kiba la kdew bad ki jingeh kiba ngi mad, da kaba trei pat kumno ban lah ban jop ïa ki jingeh na ka bynta ban wanrah jingkylla, bad nga ngeit ba ha kine ki san snem, ngin sa ïohi ki jingkylla,” u la ong.
