Shillong, Naitung 20:
Ka jingpyrshah jong kiba bun ki sengbhalang bad ki kynhun bapher bapher halor ka jingwanrah ïa ka projek ban tei ïa ka lynti rel ha Khliehriat kaba hap hapoh East Jaiñtia Hills District ka la pynlong ïa ka sorkar jylla ba kan pyndem tdong bad sngap ïa ka sur jong kiba bun.
Haba kren sha ki lad pathai khubor ha ka Sngi Palei, u Myntri Rangbah ka jylla, Conrad K Sangma u la ong ba ïa katei ka jingïakren ban wanrah ïa ka lynti rel hapoh ka Rilum Jaiñtia kam da dei eh ka mat kaba khia namar ba ka sorkar ka khlem pat shym la rai eiei satia halor katei bad ka shong ha ka jingkwah jong kiba bun balang la ki kwah ne kim kwah ban wanrah ïa ka lynti rel.
“Kaei kaba donkam ka long ka jingshim rai bad nga la dep ban pynshai sha ki paidbah ba ngin ym shim rai lane ban leh da ka bor ban wanrah ïa kane ka projek lada ki paidbah babun balang ki pyrshah bad ki sngewkhia halor kane, ngin ïaleh ban ïakren pynsngewthuh ïa kita hashwa ba ngin pynïaid shakhmat”, la ong u Myntri Rangbah.
Ha kaba ïadei bad ka jingdawa jong ka seng Congress kaba shong sha ka liang pyrshah hapoh ka ïingdorbar thaw aiñ na ka sorkar ba ka dei ban pynlong da ka jingwad bniah bad ka jingpule bha halor ka jingwanrah ïa ka lynti rel namar kane kan long ka lad ka ban plie ïa ki briew kiba nabar ka jylla ban ïoh rung laitlan katba mon shapoh ka jylla Meghalaya, na ka liang u Myntri Rangbah ka jylla u la ong ban wad bniah ne pule bha kam dei ka kam kaba eh, hynrei ka jingwan rung kyrthep jong ki briew kiba nabar ka dei ka jingeh.
Shuh shuh u Myntri Rangbah u la ong ba na ka liang jong u, u la dep ban kren shai bad pynsngew sha u Myntri ba dei khmih ïa ka tnad Railway ka sorkar pdeng, u Ashwini Vaishnaw ba ki don ki jingsngewkhia na ka liang ki paidbah ka jylla bad kam long kaba bha ban pynïaid beit shakhmat ïa ka kam da kaba bor.
Ha kaba ïadei bad ki song jingïarap kiba la mang na ka bynta ka jylla ha kaba ïadei bad ka jingwanrah ïa ka lynti rel hapoh ka jylla, na ka liang u Conrad u la ong ïa u Ashwini ba lada don ka jingbthah bad ka jingmynjur da ka sorkar pdeng ïa katei ka song jingïarap ba la bei, yn buh noh ïa kitei ki lynti rel ha ki jaka ka jylla kiba ki paidbah ki kwah bad pdiang ka ban ai jingmyntoi ïa ki paidbah bad na ka liang utei u Myntri ka sorkar pdeng u la pdiang ïa katei ka rai kaba la pynsngew da u Myntri Rangbah ka jylla.
“Nga la ïakren bad pynsngew ïa u Myntri ka tnad rel ba ïa ka pisa kaba la bei ïa ka sorkar jylla, ngin ïaleh ban pynïaid ïa katei ka jingbei tyngka ha kino kino ki thaiñ kiba kwah ïa ka lynti rel khnang ba ka pisa kaba la bei da ka sorkar pdeng kan nym sahkut”, la ong u Myntri Rangbah.
