Shillong, Naitung:
Ki pulit na ka Shillong Traffic Police (STP) ha ka sngi Balang ki la pynlong ka jingkhynra bad talasi ïa ki kali kiba tah ïit ïong bad kumjuh ruh kiba leh ‘modified’ ne pynkylla na kaei kaba la pynbit pynbiang da ka kompeni ïa ki kali.
Kane ka jingtalasi ka dei ruh namar ha ki surok jong ka nongbah Shillong la ju sakhi ba la bun ki kali kiba tah ïit ïong bad ruh pynkylla ne modify ïa ki ‘Silencer’ ne kiwei pat ki jait jingpynkylla ha ki kali, kaba ju pynthut bad pynwit ïa kiwei pat.
Ha ka sngi Balang, ki pulit STP ka thanad Lumdiengjri haba pynlong ka jingtalasi kali, ki la ïoh ban bat noh ïa ki ar tylli ki kali namar ka jingpynkheiñ ïa ki kyndon pynïaid kali, kata kawei kaba la tah ïit ïong bad kawei pat kaba la pyndait da u ‘silencer’ ba la pynkylla bad uba sawa jam.
Kine ki kali kiba la shah bat ki kynthup ïa ka auto pickup kaba don ïa u number ML05-N-7192 kaba la pyndonkam ban tah ïit ïong bad kawei pat ka Maxi Cab kaba don ïa u number ML05-G-5976 kaba la pyndait da u ‘silencer’, number plate ba la modify bad ka VIP light.
Nalor ka jingdaiñ kuna ïa ki nongñiah kali jong kine ki ar tylli ki kali, ki pulit ki la tar noh ïa ka jingtah ïit ïong na ki kali bad kurup noh ïa ka VIP light na kawei pat ka kali.
