Shillong, Naitung 20:
Lai ngut ki briew ki la shah kem noh ha ki pulit halor ka jingkynnoh donkti ban byrngem pynïap ïa uwei u rangbah hadien ba ki la rung jubor shapoh ïing jong u bad shim hi ruh ïa ka pisa na kane ka ïing.
Katkum ka khubor kaba la ïoh la ong ba ha ka 12 tarik mynta u bnai, ki pulit ka thanat Mahendraganj ki la ïoh pdiang ïa ka ejahar (FIR) na u Juda Ch Marak uba na ka shnong Mahendraganj.
Ha kane ka ejahar la ujor ba ha ka 11 tarik mynta u bnai, kata ha ka por kumba 11:45 mynmiet, katto katne ki runar ryngkat bad ki tiar pynmynsaw kiba la phong ruh da ki jaiñ shipai (camouflage) ki la leit ban rung jubor ha ka ïing jong utei u nongujor bad ban shim noh ïa ka pisa kaba don haduh T.11,600/- bad ha kaba ki la ong ruh ba kin sa wan biang ban shim shuh ïa ka pisa bad ruh byrngem ban pynïap ïa u.
Ha kaba ïadei bad kane, ki pulit ki la register case lyngba ka thanat Mahendraganj PS Case No. 20 (07) 2023 U/S. 447/ 506/ 394/ 34 IPC bad ka jingtohkit ka la ïaid shakhmat.
Na ka liang jong ki pulit ki la pynlong ka jingkhynra hapoh ka jinglam khmat jong u Naman Kumar, IPS (P), Officer–in-charge ka thanat Mahendraganj bad kiwei ki pulit jong ka South West Garo Hills DEF.
Ha kane ka jingkhynra ka la ïoh ban kem noh ïa baroh lai ngut ki briew kiba la donkti ha kane ka kam runar, kiba kynthup ïa u Walseng A Sangma na Madra, West Garo Hills, u Rakkam M Sangma na Adangre, Koinadubi, bad u Batseng A Marak na Sandagre, Polpola, West Garo Hills.
Na kine lai ngut, ki pulit ki la ïoh ruh ban kurup ar tylli ki kukri, kawei kaba heh bad kaba rit, ki jaiñ shipai (Camouflage), kawei ka thuk thuk kaba don ïa u number ML08-A-8035. Ka jingtohkit jong ki pulit ka dang ïaid shakhmat ban tip ïa ka jingthmu ba shalyndet jong kine ki briew.
