Shillong, Naitung 20:
Ka National Human Rights Commission (NHRC) ha ka Sngi Palei ka la pdiang ïa ki jingujor kiba la kyntu ba ka dei ban leh eiei halor kawei ka jingjia ha Manipur ha ka 4 tarik Jymmang ha kaba arngut ki kynthei ki la shah pynïaid lyngkhuit katba kawei na ki, ka la shah leh be-ijot ha u paidbhur.
Ha u kyrwoh, ka NHRC na New Delhi ka la ong ba katkum ki jingujor, ha ka 4 tarik Jymmang, san ngut ki dkhot jong kawei ka longïing kiba dei ki riewlum, ki la shah tan na kti ki pulit ha u paidbhur ha ka shnong B Phainom kaba don ha Kangokpi distrik.
Kita ki jingujor ki la ong ruh ba arngut ki kynthei na katei ka longïing ki la shah pynlaw bad pynïaid lyngkhuit, katba arngut ki shynrang jong kajuh ka longïing ki la shah pynïap katba ki dang pyrshang ban ïada ïa kine ki kynthei.
Nalorkata, ka NHRC ka la ong ba ki jingujor ki la ong ba kawei na kita ki kynthei ka la shah leh be-ijot ha u paidbhur (Gangrape).
Na ka liang ka NHRC ka la phah shithi sha u Chief Secretary bad u Director General of Police, Manipur ba kin ai ïa ka kaiphod kaba bniah halor katei ka jingjia hapoh shi bnai. Ha kata ka kaiphod, dei ban batai shai shaphang ka jingtohkit halor ki jingujor ba la ïoh, ka jinglong jingman ka koit ka khiah jong kitei ki kynthei bad kiwei kiba la mynsaw bad kumjuh ruh la ka sorkar ka la siew ne em ïa ka bai lutksan sha ka longïing lane sha ki briew kiba la ngat ha katei ka apot.
Ka NHRC ka kwah ruh ban tip kiei ki sienjam ba la shim bad kiba yn sa shim ban ïada ïa ka hok longbriew manbriew jong ki nongshong shnong khamtam ki kynthei bad kiwei na ki jingleh ’riewkhlaw.
Ha kawei pat ka liang, ki pulit ka Manipur ki la pyntip ba haduh mynta ka sngi, ki la ïoh kem ïa saw ngut ki briew kiba la donkti ha ka jingrahbor, jingpynïaid lyngkhuit bad jingleh be-ijot da u paidbhur ïa kitei ki kynthei.
Ïa ka jingujor kaba ïadei bad kane ka jingjia la ai ha ka thanat Nongpok Sekmai (Thoubal Distrik).
Katkum ki khubor, uwei uba la shah kem u dei uba la 32 snem ka rta bad ïa uba la tip kyrteng kum u Huirem Herodas Meitei. Une uba la shah kem u dei uba la paw dur ha ka ‘video’ kaba la saphriang ha ka Sngi Balang.
Ki pulit ki la ong ruh ba ka jingthwet ïa kiwei pat kiba la donkti ha katei ka jingjia ka dang ïaid.
