Nongstoiñ, Naitung:
Ki don haduh 42 tylli ki shnong bad 120 ngut ki bar jylla ki ban wan sam shithi hapoh ka West Khasi Hills katkum ka risol ba la pyllait ha ka taïew ba lai jong u Naitung 2023.
Ïa kane la ong da u samla Lumlang Kharsyiemlieh, President ka HYC West Khasi Hills ha ka jingdonlang u samla Wanteibok Lyngdoh General Secretary haba kren sha ki lad pathai khubor ha ka Sngi Palei.
U samla Lumlang u la ong ba ka HYC ka pynpaw ïa ka jingpyrshah ïa kane ka bynta, bad ka la phah ruh da ki shithi sha ki 42 tylli ki shnong ban kyrpad ba kin nym ai NOC ne jaka sah ïa ki bar jylla lada ki wan, khnang ba ki paradoh parasnam kin ïoh lad lada ym ailad.
“Ngi la phah biang por ïa ki shithi sha ki shnong ban kyrpad ïa baroh ki 42 tylli ki shnong ba kim dei ban ai NOC, bad ka HYC ka kren shai ba ha kane ka sien lada ka HYC kan ïohi ba ki shnong kin dang ai NOC, kan leit rah lama ïong ha kawei-pa-kawei ka ïing jong ki sordar ki 42 tylli ki shnong,” la ong u samla Lumlang.
Shuh shuh ka HYC ka kyrmen ba kumba ha kine ki kyndiat sngi na ka liang ki shnong ki la pyntip sha ka HYC ba kin ai ka jingïatreilang bad kyrshan ïa ka jingdawa ban nym shah ïa ki bar jylla ban wan sam shithi ha ki shnong. Kumta ngeit skhem ba ki shnong kin sngewthuh bad shimkhia ïa katei ka bynta, namar lada kim ïoh NOC ne jaka kim ïoh lad ban trei kin duh ïa ki kam jong ki, hangta kin sa ïohlad ki samla ka West Khasi Hills.
U la ong ruh ba ka HYC kam kwah shuh ban jia kumba jia ha kaba la dep ba ki shnong kin ai NOC ïa ki bar jylla.
