Shillong, Naitung:
Ka Food Corporation of India, North East Frontier (NEF) Region, Regional Office Shillong kaba peit ïa ka jingsam khaw na ka bynta ki lai tylli ki jylla jong ka thaiñ Shatei Lam-mihngi, ka Meghalaya, Mizoram bad Tripura, ka la pyntip ba ka la pyllait kumba 7.5 lak Metric Ton ki mar bam khlem jingsiew eiei hapoh ka Pradhan Mantri Garib Kalyan Anna Yojana Scheme naduh u Ïaïong, 2020 haduh u Nohprah, 2022.
Haba kren sha ki lad pathai khubor ha ka sngi Palei, u General Manager jong ka Food Corporation of India, North East Frontier Region, Regional Office Shillong, u SK Yadav u la ïathuh ruh shaphang ka Open Market Sales Scheme Domestic (OMSSD) Scheme ha kaba ïa u khaw bad u kew la die lilam ha ïew man la ka taïew bad ban peit ruh ba ki mar bam mar dih kim dei ban kiew dor khnang ba ki paidbah bad ki nongthied nongpet kin ïoh jingmyntoi.
U General Manager u la ong ba ka FCI kan pyntreikam noh da ka Open Market Sales Scheme Domestic (OMSSD) ban lilam ïa u khaw sha ki ïew ki hat man ka taïew bad pynpaw ruh ba kane kan ïarap ïa ka FCI ban peitngor ïa ka dor jong u khaw bad u kew na ka bynta ka jingmyntoi ki paidbah.
U SK Yadav u la ïathuh ba ka kudam hapoh ka jingkhmih ka North East Frontier (NEF) ka la kiew kumba 40 % hapoh lai snem, kata na ka 87070 MT sha ka 122636 MT.
U la ïathuh ba ka FCI kan sa tei ruh ïa ki kudam kaba ngiam kumba 88000 MT ban buh ïa u khaw bad kew ha kylleng ka jylla Meghalaya bad kiwei ki jylla ka thaiñ Shathei Lam-mihngi (North East) lyngba ki skhim bapher bapher.
Shuh shuh na ka liang jong u General Manager ka FCI u la pyntip ruh ba ka FCI ka don ïa ka jaka kaba biang ban buh ïa ki mar bam naduh u khaw, u kew bad u ata, hynrei ka ai ïa ki mar bam pat katkum ka jingjied jong ki sorkar jylla, kiba pynbiang ïa ka thup jong ki jingbam ba ki kwah bad donkam, ym dei ka FCI kaba pyllait hi.
