Shillong, Naitung 21:
Ka Jaiñtia Student’s Union (JSU) ka la dawa ïa ka nongbah por lyiur (Summer Capital) hapoh ka thaiñ Rilum Jaiñtia kaba ïasyriem bad ka jingdawa nongbah por tlang (Winter Capital) ba la dawa da ka ACHIK hapoh Tura.
Ka JSU ka ngeit skhem ba ka thaiñ Rilum Jaiñtia ka dei hok ban ïoh kum ka nongbah jong ka jylla namar ka wanrah ïa shibun ka khajna na ka bynta ka jylla lyngba ka jingdon jingem jong ka mei mariang kaba kynthup ïa u dewïong bad ïa u mawshun, ki karkhana pynmih dewbilat, hynrei kumba ka long ym pat da ïohi satia ïa kata ka roi ka par kaba tikna ban ïa kaba ïanujor bad kiwei ki jaka.
Katba ka jingong jong ka JSU ba ka thaiñ ka la nohsynñiang sha ka khajna ka jylla ka long kaei-kaei kaba lah ban pdiang. Kumta ka long kaba donkam ban khmih ïa kita kiei kiei baroh da kaba peit ïa ki jingshisha.
Ka jingrai ban pynkynriah ïa ka nongbah jong ka jylla ka kynthup da kaba khmih bad peit ïa ki jingmih ha kylleng ki thaiñ, ka jinglah ban kyntiew ïa ka roi ka par bad ka jingbit jingbha na ka bynta baroh ki nongshong shnong.
