Shillong, Naitung 21:
Ka seng kiba duna dkhot met ha Jylla kaba tip kum ka Federation of Persons with Disabilities ka la ïakynduh ïa u Myntri ka tnat Social Welfare ha ka sngi Thohdieng bad buh hakhmat jong u ïa ki jingdawa kynthup ka jingpynlong ïa ka eksamin kaba kyrpang ban pynrung kam ïa kiba duna dkhot met ha ki tnat treikam ka Sorkar.
Hadien ba la ïakynduh ïa u Bah Paul Lyngdoh ha ka sngi Thohdieng, u nongïalam jong kane ka seng u Bah Starwin Kharjana u la ong ba ka seng ka la pynsngew ïa ki jingdawa kiba sahteng kiba kynthup ïa ka jingdawa ban thungkam ïa kiba duna dkhot ha ki tnat treikam ka Sorkar, ban pynlong eksamin thungkam kaba kyrpang lada jia ba ki kam ki lait thylli haba ki nongtrei Sorkar kiba don jingduna dkhot met ki khlad noh ne iehnoh kam namarba ki la ïoh kam shawei pat.
Kane ka seng ka la dawa ruh ban thung ïa uwei u dkhot hapoh MPSC bad DSC khnang ba uta u dkhot un peit lem ïa ka jinglait kam bad bhah lypa na ka bynta kiba duna dkhot ynda la khot ban pynrungkam ha ki tnat treikam ka Sorkar.
U Bah Kharjana u la ong ruh ba ka Roster System kaba pynbeit da ka Sorkar na ka bynta kiba duna dkhot met haba ïadei bad ka jingthungkam ka long kaba dei eh bad ïahap na ka bynta jong ki.
Shuh shuh kane ka seng ka dawa ruh na ka Sorkar Jylla ba kan peit ba ki jaka pule kiba ïoh jingïarap na ka Sorkar kin bhah lang ïa kiba duna dkhot met ba kin ïoh leit pule ha kino kino ki jaka pule kiba ju ïoh jingïarap na ka Sorkar.
