Shillong, Naitung 21:
Ka Khasi Jaiñtia Christian Leaders Forum (KJCLF) lem bad ka Presbyterian Women’s Fellowship jong ka General Assembly, Presbyterian Church of India (PWF-PCI) ha ka Sngi Thohdieng ki la pynrem jur halor ka jingshah thombor ki kynthei ha Manipur.
“Haba phai sha ka jinglong-jingman ka jingïakynad jaidbynriew ha Manipur ka bym i don jingtikna lano kan kut, ka long kaba jah burom ban ïohi ba kito kiba donkti pyrshah ki kam thombor ïa ki kynthei ki la hiar kyrdan haduh katta-katta bad pynpoh dor ïalade ban pyni ba kim ïapher shuh na ki mrad – sniew jinglong, ’riewkhlaw bad ban kthong ïa ki kynthei ki bym lah ban ïada ïalade na ka jingkhie lamwir u paidbhur,” la ong u Secretary KJCLF, Rev. Dr. Edwin H. Kharkongor ha ka kyrwoh khubor.
Ka KJCLF ha kajuh ka por ka pynrem jur ïa kiba kum kitei ki kam thombor bad ïa baroh kito kiba don bynta, kumjuh ïa kito kiba pynshit ïa kiba kum kitei ki kam be-aiñ.
“Ngi kyntu ïa ka Meira Paibis ka Manipur ban ïeng skhem ha la ki nongrim – ban ïada, kyntiew bad pynneh pynsah ïa ka burom ka ijot jong ki kynthei hapoh ka imlang-sahlang,” u la ong.
Ka kynhun ka la pynpaw ruh ïa jingkyndit kaba khraw ba u Myntri Rangbah ka Manipur, u Biren Singh u la kubur ba ki don da ki spah tylli ki jingjia kiba kum kitei ha Manipur, bad ba u Myntri Rangbahduh ka ri haba pynpaw ka jingsngewkhia bad jingbitar u la ong ba kine ki kam be-aiñ ki pynjah burom ïa ka ri baroh kawei.
Haba kdew ba ka jingkular u Myntri Rangbahduh la sngew bad sawa da kaba shai ba yn ym map ïa kito kiba donkti, ka seng ka khmih lynti ba kane ka jingkren u Modi kan sa urlong bad shen.
“Ngi sngewnguh shi kat dei ïa ka jingkren bad jingtuklar jong u Chief Justice ka India, u D.Y. Chandrachud, uba la kyntu ïa ka Sorkar ban leh eiei noh kloi halor katei ka jingjia. Kane ka long ka jingkular sha ka ri bad khamtam sha ki lanot kiba la mad ïa katei ka jingjia ba kin sa ïoh ïa ka hok,” la ong u Rev. Kharkongor.
Na ka liang ka Presbyterian Women’s Fellowship jong ka General Assembly, Presbyterian Church of India (PWF-PCI) ka la ong ba kum ki nongshong shnong jong ka ri, kam don kyntien shuh ban pynpaw ïa ki jingsngew bad jingsngewsih jong ka halor ka jinglong-jingman ha Manipur.
“Ngi pynrem jur ïa kine ki kam be-aiñ kiba long pyrshah sha ka longbriew-manbriew bad dawa ïa ka hok na bynta ki lanot kiba la mad ïa katei ka jingjia,” la ong ka kyrwoh na ka Chairperson ka PWF, Kong Maya Pohleiñ.
Ka kynhun ka dawa ruh ba ka Sorkar Jylla bad Sorkar Pdeng kin shim ïa ka bynta ba la bynshet ha ki – ban ïada ïa ki nongshong shnong kumjuh ban pynshitom ïa baroh kito kiba donkti.
“Ngi dawa ba dei ban pynbiang ïa baroh ki jingdonkam sha baroh ki ‘Relief Camp’ ba la pynïeng ban ïarap ïa ki lanot ha Manipur katkum ki hok jong ki nongshong shnong kane ka ri,” ong ka Chairperson.
