Shillong, Naitung 21:
Ka President ba dang shu shah jied thymmai jong ka BJP Meghalaya Mahila Morcha ka Kong Susuki Pariat ka la pynpaw ka jingsngewdom bad sngewshrai haba ka ïohi ïa ki durkhih (video) ba ki shynrang ki la phah ïaid lyngkhuit ïa ki ar ngut ki kynthei ha Manipur.
Kane ka jingpynpaw ka Kong Pariat ka dei hadien ba U Nongsaiñ Hima u la ïoh ban ïakren namar kane ka durkhih kaba shah pynkhlemraiñ ïa ki ar ngut ki kynthei ha Manipur ka la jur bha ka jingïatai ha ka ri India bad ka jingïatai kaba dang khluit ka dang ïaid ha ïingdorbar Parliament jong ka Lok Sabha bad Rajya Sabha.
Wat la kiba bun ki la kynnoh ba dei ka sorkar BJP ka bym lah ban tehlakam ïa ka shongsuk ha katei ka jylla, hynrei ka Kong Pariat kum ka nongïalam ka BJP ki longkmie ha Meghalaya ka la pynpaw ba ka kmie ne u kpa kim shym la phah ïa ki khun ba kin leh ïa ki kam sniew, hynrei kino-kino kiba leh ïa ki kam sniew dei ban pynshitom kaba tyngeh.
Ka Kong Pariat ka la pynpaw ruh ba ka aiñ ka dei ban pynshitom.
“Nga ngeit skhem baroh kito ki ’riew thrang snam kin ïoh pynshitom, baroh khoit kiba la donkti ban pynïaid lyngkhuit ïa ki ar ngut ki kynthei namar kane ka la pynjah burom ïa ka longrynïeng jong ki kynthei” ka la ong.
Nangta, ka la pynpaw ka jingsngewlehraiñ bad sngew ïam-rem ba kum kine ki jingjia kin wan ha ka thaiñ Shatei Lam Mihngi ha kaba ka ri India ka la ïakren lut ïa kane ka jingshah pynïaid lyngkhuit ïa ki kynthei ha Manipur.
Ka la ong ruh ba ka BJP ka ïeng ban wanrah ïa ka synshar khadar kaba khuid khlem da ñiew ïa ki jaid niam ne jaidbynriew.
Halor kane kajuh ka jingjia, ki seng niam bad ki sengbhalang kiba kynthup ïa ka General Assembly Presbyterian Church of India kaba la soi da u Rev. BB Lamin kum u Moderator bad u Rev. Dr. K Lalrinkima, Sr. Administrative Secretary bad ka North East Students Organisation (NESO) kaba la soi da u Bah Samuel Jyrwa kum u Chairman bad u Mutsikhoyo Yhobo kum u Secretary.
