Shillong, Naitung:
U Myntri Rangbah ka jylla, Conrad K Sangma u la pyntip na ka liang ka jong u, u la buddien ha kaba ïadei bad ka jingshong shah thngan ki sengbhalang na Ri Lum Garo da kaba ïakren bad ki Deputy Commissioner (DC) ka thaiñ.
Haba kren sha ki lad pathai khubor ha ka sngi Palei, u Myntri Rangbah u la ïathuh ba ki sengbhalang kiba la shong shah thngan ha Rilum Garo ki kwah ban ïakren bad ïakynduh ïa u ynda u la wan hiar shapoh Rilum Garo hynrei na ka liang ka jong u, u la ai ka jingkular ba un sa ïakynduh pat ïa ki nongïalam jong ka ACHIK ha ka sngi kaba un leit ban hiar sha Rilum Garo.
U Myntri Rangbah u la ïathuh ba ha katei ka jingïakhih ba la pynlong da ka seng ACHIK, la sakhi ba ki Additional Deputy Commissioner bad ki doktor ki la ïadon lang ha katei ka jaka ban peit bad bishar ïa ka jinglong jingman naduh ka koit ka khiah bad kiwei kiwei.
Ha kaba ïadei bad ka jingdawa jong ka seng ACHIK ban pyntreikam ïa ka Roster System na shadien, u Myntri Rangbah u la ong ba ka long kaba eh ban phai dien biang ïa kaei kaba la dep ban ïakren namar ïa ka rai la shim ha ka jingïasyllok lang bad baroh kiba ïa don bynta kiba kynthup ïa ka ACHIK na Rilum Garo bad hadien ka jingïasyllok, la pynïaid shakhmat ban shim ïa ka rai ban pynmih ïa ka Office Memorandum (OM) kaba thymmai.
Halor ka jingdawa ban pynlong nongbah ïa ka Tura, na ka liang u Conrad u la ong ba kum ka sorkar MDA ka pynleit jingmut ha ka ban wanrah ïa ka roi ka par bad ïa ka roi ka par la leh ha ka rukom kaba heh bad kaba biang lang na ka bynta baroh ki thaiñ hapoh ka jylla.
U Myntri Rangbah u la ong ruh ba ka jingbuh ïa ka Mini Secretariat ha Tura kan long kawei na ki jingmyntoi ïa ka thaiñ Garo Hills baroh kawei bad ka sorkar kan ïaleh katba lah ban pynsngewthuh ïa ki nongïalam ka ACHIK halor kane ka bynta.
“Yn sa buh ïa ka Mini Secretariat hangthie bad ngin sa pynkhlaiñ ïa ki tnad sorkar bapher bapher bad ngin sa khmih na ka bynta ka jingwanrah ïa ka roi ka par lyngba ki skhim ha ka rukom kaba khlaiñ hapoh Rilum Garo”, la ong u Myntri Rangbah.
