Ka NITI Aayog ka la pynpaw paidbah dang shen ïa kaei kaba kiba bun ki la sngewthuh lypa bad kata ka long ban pynbna ïar ba ka Meghalaya ka dei kawei napdeng ki jylla ba ka jingduk jingkyrduh ka jur tam ha ka Ri India. Dang shen, kane ka NITI Aayog ka la pyllait paidbah ïa ka kaiphod kaba la ai kyrteng “National Multidimensional Poverty Index: A Progress Review 2023” bad la pyntip ba ka Meghalaya ka la wan ha ka kyrdan kaba lai hapdeng ka jingbun ki briew kiba duk. Ka jylla ba wan nyngkong ka dei ka Bihar bad ba ar ka dei ka Jharkhand.
Ka kaiphod na ka NITI Aayog ka pyni ïa ka jingdon kiba duk ha kiba bun ki liang da kaba peit ïa ki jingkheiñ ba la lum ha ka por ba la leh ïa ka sorjamin National Family Health Survey (NFHS). Ka kaiphod banyngkong na ka NITI Aayog halor ka jingdon ki baduk ka long ha u 2021 da kaba peit ïa ki jingkheiñ ka NFHS-4 jong u 2015-16. Mynta, ka NITI Aayog ka la peit ïa ki jingkheiñ na ka NFHS-5 jong u 2019-21 bad ka la pynïanujor bad ki jingkheiñ na ka NFHS-4 2015-16. Nangne, ka sa pyni pat katno ngut kita ki briew kiba la lait na ka jingduk hapdeng u snem 2015-16 haduh 2019-21.
Ka NITI Aayog ka la pyni ba ha ka “Headcount Ratio”, ka jingdon ki baduk katkum ka NFHS-4 ha u snem 2015-16 ha Meghalaya ka long 32.54% katba ha ka NFHS-5 ha u snem 2019-21 ka long 27.79%, kaba pynpaw ba ka jingdon ki baduk ka la hiar da 4.75%. Na kine, ka NITI Aayog ka la kdew ruh ba ki la don 1,56,738 ngut ki nongshong shnong ka Meghalaya kiba la mih noh na kata ka thup kaba ki ong “Multidimensional Poverty” lane ka jingduk ha kiba bun ki liang. Hynrei watla katta ruh, ka Meghalaya ka wan hadien ka jylla Bihar bad Jharkhand ha ka jingdon kiba duk.
