U Myntri Rangbah uba riewspah
Ha u Ïaïong 2023, ka Association for Democratic Reforms (ADR) ka la pynbna paidbah ba u Myntri Rangbah ka Meghalaya, u Conrad K Sangma, u wan ha ka kyrdan kaba khyndai ha ka jingdon spah jingdon phew napdeng baroh ki Myntri Rangbah ha ka Ri India. Ka ADR, da kaba peit bniah ïa ki kot ilekshon ba la ai da u Conrad, ka la ong ba ki jingdon jingem jong u Myntri Rangbah ka Meghalaya ka la kot sha ka T. 14 klur tam
Ki Myntri kiba riewspah
Ha u bnai Lber 2023, ka ADR ka la pyntip ba baroh 12 ngut ki Myntri ha ka sorkar Meghalaya Democratic Alliance (2.0) ki dei kita ki ‘Crorepati’ lane ki briew kiba ka jingdon jingem jong ki ka long palat T. 1 klur. Uba wan hakhmat duh u dei u Symbud Myntri Rangbah, Bah Sniawbhalang Dhar, ha kaba ki jingdon jingem jong u baroh ki long palat T. 45 klur. Hadien jong u Bah Sniawbhalang, uba wan ba ar u dei u Myntri Sorkar, u Bah Comingone Ymbon, bad ka jingdon jingem jong u baroh ka long T. 23 klur tam.
Nangta, bud sa u Myntri Sorkar, Bah A.L Hek (T. 16 klur tam), u Myntri Rangbah, Conrad K Sangma (T. 14 klur tam), Symbud Myntri Rangbah, Bah Prestone Tynsong (T. 12 klur tam), Myntri Sorkar, u Bah Shakhliar Warjri (T. 9 klur tam), Myntri Sorkar, u Marcuise N Marak (T. 3 klur tam), Myntri Sorkar, u Bah Paul Lyngdoh (T. 2 klur tam), ka Myntri Sorkar, Kong M Ampareen Lyngdoh (T. 2 klur tam), Myntri Sorkar, u Abu Taher Mondal (T. 2 klur tam), Myntri Sorkar, u Bah Kyrmen Shylla (T. 1 klur tam), bad u Myntri Sorkar, u Rakkam A Sangma (T. 1 klur tam).
Ki MLA kiba riewspah
Mar ïa dep ka ilekshon MLA ha u Lber 2023, ka ADR ka la pynmih ïa ka kaiphod halor ka jingdon jingem jong ki MLA kiba la shah jied. Na kane ka kaiphod la ïohi ba ki MLA ‘Crorepati’ lane kiba ka jingdon jingem ka long palat T. 1 klur ki kynthup ïa 2 ngut ki MLA ka BJP, 2 ngut na ka HSPDP, 2 na ka PDF kiba mynta ki la kylla long noh ki MLA ka NPP, 9 ngut na ka UDP, 9 ngut na ka UDP, 4 ngut na ka All India Trinamool Congress (AITC), 20 ngut na ka NPP, 3 ngut na ka Congress, 2 ngut na ka Voice of the People Party (VPP), bad uwei u MLA khlem seng (Independent). Haba la kheiñ kyllum, 45 ngut na ki MLA ki dei kita ki ‘Crorepati’.
Ki lai ngut ki MLA kiba heh spah tam ki long u Bah Metbah Lyngdoh na ka UDP (T. 146 klur tam), u Bah Methodius Dkhar na ka HSPDP (T. 55 klur tam) bad u Bah Sniawbhalang Dhar na ka NPP (T. 45 klur tam).
Ki lai ngut ki MLA kiba duna tam ha ka jingdon jingem ki long u Rupa M. Marak na ka AITC (T. 5 lak tam), Bah Adelbert Nongrum na ka VPP (T. 13 lak tam), bad u Bah Nujorki Sungoh na ka UDP (T. 18 lak tam).
