Shillong, Naitung:
U General Manager jong ka Food Corporation of India, North East Frontier Region, Regional Office Shillong, u SK Yadav u la kyntait war ïa ka jingkynnoh ba ka Food Corporation of India ka la sam da u khlaw plastic sha ki paidbah jong ka jylla Meghalaya.
Ha ka jingïakynduh bad ki lad pathai khubor ha ka sngi Palei u SK Yadav u la ong, haduh mynta ka Regional Office kam pat ïoh satia ïa kano kano ka jingujor halor kane. Ha kajuh ka por u la pynshai ba u khaw ba la khleh dawai um dei satia u khaw plastic bad ki paidbah kim dei satia ban sngewthuh bakla halor kane.
Shuh shuh u Yadav u la ong, “Imat ka don ka jingsngewthuh bakla na ka liang jong ki paidbah halor u khaw plastic bad ong ha ka por ba la shet lada ym pyllait wut-wut ïa ka jingkhluit u sdang ban sieb kynsan bad imat dei na kane ka daw ba ki briew ki khot u khaw plastic.”
U SK Yadav u la ong ba lada ïanujor ïa ka dor, yn dang kham rem shibun shah u khaw ba la shna da u plastic ban ïa u khaw ba rep hi da ki briew. Ha kajuh ka por u la ong, lada ki paidbah ki lap shisha ïa uta u khaw plastic ki dei ban wan ujor sha ka FCI khnang ba kan ïoh leh ïa kaba donkam.
Ha kaba ïadei bad ka jingkynnoh ba ka la don ka jingshalan tuh ïa u khaw bad haba kylli khamtam ha kaba ïadei bad u khaw ba jah na ka bhah ka Meghalaya ba poi sha Assam, u SK Yadav u la pynshai ba kane ka jingjia kaba la kham slem kam ïadon bynta eiei bad ka shlem treikam jong ka Food Corporation of India namar ba ïa u khaw la sei da ka Sorkar Jylla ym da ka Food Corporation of India.
“Na ka liang jong ka FCI, ngi pynpoi beit katkum ka jingkwah jong ki jylla ïa u khaw. Ha kaba ïadei bad ka Meghalaya ruh namar bym don ka rel, kumta ngi hap ban pynpoi ha Assam bad nangne pat ka la dei ka kamram jong ka sorkar jylla ban sei,” u la ong bad bynrap ba ka FCI kam don jingtip eiei namar ba ïa u khaw la dep ban aiti sha ka sorkar jylla.
