Shillong, Naitung 21:
Ka Sorkar MDA-2 ha ka sngi Thohdieng ka la aiti ïa ki kot thungkam sha ki 1,010 ngut ki pulit kiba la shahjied ban rung kam thymmai hapoh ka tnat pulit na ka bynta ban shakri ïa ka Jylla. Ha kane ka sngi la ïoh ruh ïa ki kyntien kitbok kitrwiang na u Myntri Rangbah ka Jylla u Conrad K Sangma uba la ong ba ki don ka bynta jong ki kum ki nongda na ki jingma bad long ka jingshngaiñ ïa ka Jylla.
Ka jingïalang pdiang burom ïa ki pulit thymmai sha ka kam shakri la pynlong ha Shillong International Centre for Performing Arts and Culture (SICPAC) ha ka jingsakhi lang u Symbud Myntri Rangbah Bah Prestone Tynsong lem bad u Chief Secretary Bah DP Wahlang, u DGP Dr LR Bishnoi bad kiwei kiwei ki pulit ophisar.
U Myntri Rangbah u la ong ba ka Sorkar Jylla ka ai jingithuh ïa ka jingong ki pulit kiba lah ban trei kum ka kynhun nongda ban ïakhun ïa ki kam sniew bad ban pynneh ïa ka suk ka saiñ.
Kumta u la ong ba la shim ïa ki sienjam ban nang pynkhlaiñ ïa ka jingpyntreikam ïa ki kyndon aiñ kynthup ka jingthung ïa u Commissioner of Police ha district bad ka jingpynrung kam shuh sa kumba 2000 ngut hapoh ka tnat pulit.
Ban nang aibor ïa ki pulit da ban shim ïa ki lad ki lynti ha ryngkat ki kor ki bor ban ïakhun ïa ki nongleh kam sniew bad ban lah ban poi kloi sha ka jaka, la pynkhreh ruh ban buh kali ha ki Thanat bapher bapher bad outpost kynthup ka jingai ïa ki kali ar shaka khnang ba kin poi kloi sha ki jaka ha ka por ba kyrkieh bha.
U Myntri Rangbah u la ong ruh ban thaw ïa ka engineering wing jong ka tnat Pulit ha kaba u Superintendent of Police (SP) un long u Chairman khnang ba yn lah ban pynbiang ruh ïa ki jingdonkam ha ki jingtei jingshna.
U la ong ruh ba ki sienjam kin peit lem ruh ïa ki jingdawa bad jingmang pisa na ka bynta ki jingtei jingshna.
Ka Central Recruitment Board ka la lah ban jied 1,010 ngut ki pulit na kiba thep kam kumba 1.5 lak. U la ong ba kine kiba shahjied kin sa lah ban shakri da ka jingkut jingmut bad aiti lut na ka bynta ban don ka jingpynneh ïa ka burom bad ka dor kum ka kynhun pulit.
La ïoh jingkren ruh na u Bah Prestone Tynsong nalor u DGP ka Jylla.
Ha kane ka sngi la aiti ïa ka shithi thungkam da u Myntri Rangbah sha ki katto katne kiba kynthup ïa ka Ibapalei Syiemlieh, Ferdinand Chyrmang, Jessica Kharbuki bad Meghna D Sangma.
