Shillong, Naitung 21:
Ka shnat treikam jong ka tnat rel ka Sorkar Pdeng, ka North East Frontier Railway (NFR) kaba peit ïa ki projek shna lynti rel ha ki Jylla ka thaiñ Shatei Lam Mihngi ka kren shai ba kino kino ki projek kiba ym lah ban pynïaid shakhmat yn sa iehnoh ynda la ïoh ka jingbthah na ka tnat rel kynthup ïa ka projek lynti rel ha ki bynta jong ka Rilum Khasi ha Meghalaya.
Ban ïoh jingtip bad sngewthuh kumno ka projek shna lynti rel kan long ha Rilum Khasi Jaiñtia namarba kam ïaid shuh shakhmat ka projek na Tetelia sha Byrnihat kaba dei ruh ban ïasoh shaduh Shillong, U Nongsaiñ Hima u la ïoh ban ïakren bad u Chief Public Relation Officer (CPRO) ka NFR, u Sabyasachi De uba la batai katto katne ki bynta kiba ïadei bad kane ka projek.
U la ong ba haduh mynta kane ka projek kam pat kut, bad ym pat don kano-kano ka jingbthah na ka Sorkar Pdeng ban pynkut noh.
Haba kylli, la ka don ka lad ban pynphai noh sha kiwei pat ki jaka ïa kane ka projek namarba ki don katto-katne kiba pyrshah, u De u la ong, “ka NFR kam don bor ban leh ïa kata, hynrei ngin sa leh ynda ka tnat rel ka Sorkar Pdeng ka shim rai ban pynkut noh ïa kane ka projek ha Rilum Khasi Jaiñtia.”
Haba kylli la ka Rilum Garo ka lah ban ïoh projek biang ban shna pynjrong shuh shuh ïa ka lynti rel da kaba bteng na Mendipathar, une u ophisar ka NFR u la ong ba haduh mynta kam pat don kano-kano ka jingïakren bad lada kan wan kum kata, kaba nyngkong eh ka kam ka ban sdang ka dei ka jingpeit bniah ïa ka jaka bad ki lum ki them kiba biang ban shna ïa ka lynti rel bad haduh hangno yn pynkut, khnang ban tip ban ai jingkheiñ ïa ka jingmang pisa ïa ka projek thymmai.
Na ka liang u Myntri Rangbah, Conrad K Sangma u la kren ba ka Sorkar Jylla kan nym leh donbor lada ym don ka jingkyrshan na ki paidbah. Ïa kane u la dep pynsngew ruh ha u Myntri ka Sorkar Pdeng uba peit ïa ka tnat rel ba ka projek kan nym ïaid shakhmat kat bym pat don ka jingmynjur lang.
U Conrad u la ong ruh ba ka Sorkar Pdeng ka la pynpaw ba kane ka projek ka la sahteng la slem bad lada ym lah ban pynïaid shakhmat ka bha ba pynphai noh sha kiwei pat ki bynta jong ka Jylla kiba ki paidbah ki kyrshan bad pdiang ïa ka projek.
Ka projek lynti rel na Tetelia sha Byrnihat ka la sahteng da ki phew snem namar ka jingmih ka jingpyrshah na ki katto-katne. Ha ka jingshisha kane ka projek ka la sdang ban ïaid shakhmat ha u snem 2017 ha kaba sdang ban shna ïa ka lynti rel ha thaiñ Byrnihat kynthup ïa ka jaka sangeh rel. Hynrei namar ka mih ka jingpynwit bad shah thang ki tiar ki tar ha u snem 2017, kane ka projek ka la sahteng noh biang haduh mynta.
