Shillong, Naitung 21:
Ki nonghikai kolej kiba don hapoh ka synjuk jong ka Meghalaya College Teachers Association (MCTA), ka la pynpaw ka jingkyndit halor ka jiingpynbna kaba la shu pynmih kyndit-kynsan da ka skulbah North Eastern Hill University (NEHU) halor ka jingshim rai ban pyntreikam noh ïa ka National Education Policy (NEP), 2020, bad ther tyngeh ïa u Vice Chancellor u Prabha Shankar Shukla bad kynnoh ba u la leh khlem ka jingmynjur da kawei ka sur ha ka jingïalang kaba 110 jong ka Academic Council ka NEHU.
Haba kren sha ki lad pathai khubor ha ka Sngi Thohdieng, ka President ka MCTA ka Dr. B.H Buam ryngkat kiwei pat ki nongïalam ka synjuk, ki la pynpaw ïa ka jingbym pat biang ban pyntreikam noh ïa ka NEP ha ka Jylla.
Haba pynkynmaw ïa ka jingïalang ka Academic Council kaba khlem pat shim rai ban pyntreikam noh ïa ka NEP, 2020, kine ki nonghikai kolej ki la ong ba ha shuwa ban shim ïa kano kano ka rai, dei ban shim da ka jingïamynjur lang.
Ka Dr. Buam ka la ïathuh ruh ba na ka liang ka jong ka MCTA, ka la phah da ka jingthoh sha u VC ka NEHU ban pynpaw ka jiingpyrshah namar ym pat don satia ka rai ban pyntreikam noh ïa ka NEP ha ka jingïalang jong ka Academic Council jong ka NEHU.
Na ka liang u VC ka NEHU u la kam ba ka Academic Council ka la rai ban pyntreikam ïa ka NEP bad ïa ka rai la pynskhem ruh da ka Executive Committee jong ka skulbah.
Hynrei, ka MCTA ka la kynnoh ba ka jingleh jong u VC ka dei ka jingthok namar bym pat shim rai satia haba ïadei bad ka jingpyntreikam ïa ka NEP ha Jylla.
Ki la ong ba wat u Myntri ka Sorkar Jylla u Rakkam A Sangma ruh u la pynpaw lyngba ki lad pathai khubor ba ka jylla kam pat long kaba la khreh ban pyntreikam ïa ka NEP.
