Shillong, Naitung 21:
U Myntri Rangbah ka Jylla, Conrad K. Sangma u la ong ba ka Sorkar ka la shim ïa ki sienjam kiba tyngeh ban tehlakam ïa ki kam thombor pyrshah ïa ki kynthei.
“Kane ka long kaei-kaei kaba ngi hap ban shim khia. Hooid ngi ïohi ba ki kam thombor pyrshah ïa ki kynthei ki ju don beit bad ngi la shim ïa ki sienjam halor kane,” la ong u Sangma haba kren sha ki lad pathai khubor ha ka Sngi Thohdieng.
U Sangma haba pyntikna ba yn sa pynrung bun ngut ki kynthei ha ka tnad pulit ka Jylla, u la ong ba ka Sorkar kan ïaleh katba lah ban pynsted ïa ka jingtohkit khnang ban lah mudui kloi pyrshah ïa kito kiba shah kynnoh donkti ha ka por kaba biang.
“Ki don ki lad ki lynti kiba tyngeh kiba ngi la shim na ka liang jong ngi. Hooid yn hap peit baroh arliang. Ngi donkam ïa shong suk shong shngaiñ, ngin donkam ruh ïa ki jingpynshitom kiba tyngeh ki ban treikam ne ka jingset along,” u la ong.
Ha kajuh ka por, u la ban jur halor ka jingdonkam ban ïatreilang bad ka imlang-sahlang, kumjuh ban pyntikna ïa ka jingïasyllok, ki prokram ai jinghikai sha ki paidbah nalor kiwei-kiwei.
“Kumta ka dei ka bynta ha kaba ngi hap ban ïatreilang. Ka shong suk shong shngaiñ bad ka jingpynshitom ruh ki long ki bynta ba kongsan,” u la ong.
Shuh shuh u la bynrap ba ka Sorkar kan shim baroh ki lad ki lynti ban pyntikna ïa ka jinghiar jong ki kam thombor pyrshah ïa ki kynthei bad ban pyntikna ba kito kiba donkti kin shah pynshitom.
Kum ban shu kdew hangne, ka Ri India ha ka Sngi Balang ka la kyndit thret hadien ba kawei ka dur khih (Video) ka la paw pyrthei halor ka jingshah pynïaid lyngkhuit ki arngut ki kynthei ha Manipur.
Katkum ka jingpyllait khubor na ka kynhun Indigenous Tribal Leaders’ Forum (ITLF), la ong ba katei ka jingshah pynïaid lyngkhuit ki arngut ki kynthei kiba dei ki Kuki-Zo ka la jia ha ka 4 tarik Jymmang, 2023, shi sngi hadien ba ka jingïakynad jaitbynriew ka la sdang ha Manipur.
Katei ka kynhun ka la ong ba katei ka la jia ha ka shnong B Phainom kaba hap ha Kangpokpi distrik ha ka 4 tarik Jymmang.
Ka ITLF ka la dawa na ka Sorkar Pdeng, Sorkar Manipur, National Commission for Women bad ka National Commission for Scheduled Tribes ban shimkhia halor katei ka jingjia bad ban leh ïa kaba donkam ban kem ïa kiba donkti.
