Shillong, Naitung 21:
U Rangbah Shnong ka Mawpat, Bah Juda Wahlang u la pynpaw ba u ju bam tit man ka sngi, hynrei um ju lei-lei namar haba leit kheit ïa u tit da ka jingtip. Pynban kito ki briew kiba bam ïa u tit bad poi sha ka jingkhlad noh na kane ka pyrthei ka dei namar kim da ithuh bha.
Kane ka jingpynpaw u Bah Wahlang ka dei ha ka jingïakren bad U Nongsaiñ Hima ban buddien halor ka jingkhlad noh jong lai ngut ki briew ha Umsawli kaba hap ha shnong Mawpat ha kine ki khyndiat sngi tang namar ba ki bam ïa u tit uba buit bad long bih.
Kane ka jingïakren bad u Rangbah Shnong Mawpat ka dei namar ki nongdie tit harud surok ban leit sha NEIGRIHMS Hospital Mawdiangdiang kaba dei ruh ka lad ban kiew sha Mawpat ki la hiar ka jingdie ïa u tit naduh ba ki briew ki la sheptieng ban bam tit namar ka jingkhlad noh jong lai ngut ki briew ha Umsawli.
“Nga la peit ïa u khiew ba ki shet jong kito ki briew kiba la khlad ha Umsawli, nga ïohi ba ki don ki tit ba long rong ïong kiba ngi khot tit doh ne tit tyngab kaba ngi ju ïa bam, ki don ruh kita ki tit kiba ïasyriem hynrei kiba buit pat, lehse kim ithuh ki ngat ha kum kita” u la ong.
Kumta kum u Rangbah Shnong u la kyntu ïa ki paidbah ba lada ki kheit ïa u tit da ka jingtip bad ki shet da ka jingtip kan nym don kano kano ka jingjia ba sngewsih, hynrei lada leit kheit ïa u tit khlem ka jingtip bad jingithuh kan wanrah ka jingmynsaw.
