Mawkyrwat, 21 Naitung:
Kawei ka Local Taxi Alto kaba don ïa u nombor MLO6 – 2696 kaba la shong da hynñiew ngut ki briew kynthup ïa u nongñiah ka la kylla noh ha kawei ka riat hajan ka shnong Mawthawpdah ha South West Khasi Hills District.
Katkum ki tyllong khubor na ki pulit la ïathuh ba kane ka jingjia ka la jia ha ka janmiet Sngi Palei ha ka por kumba 7:30 eiei.
Ka khubor ka la ïathuh ruh ba kane ka kali ka dei kaba mih na ka shnong Riangdo ban leit sha Mawthawpdah hynrei shwa ban poi sha ka jaka ba ki thmu, ka kali ka la kylla noh ha kawei ka riat kaba jrong kumba 20 phut eiei.
Ha kane ka jingjia hynñiew ngut ki briew ki la mynsaw kynthup ïa u nongñiah bad la pynkit noh ïa ki sha Civil Hospital, Mawkyrwat.
Kine kiba mynsaw ki long i Naphiwanbiang Lyngkhoi, 1 snem, Shanborlang Lyngdoh, 4 snem, Rosemery Lyngdoh, 3 snem, Ailanda Lyngkhoi, 38 snem, Plin Lyngdoh Nonglait, 42 snem, Treibormi Lyngdoh, 30 snem, bad u Primus Lyngkhoi 40 snem uba dei u nongñiah.
