Tura, Naitung 21:
Hapdeng ka jingdon jong kiba pyrshah ha sor Tura halor ka jingkren jong ka ha kaba ïadei bad ka jingdawa ban pynlong ïa ka Tura kum ka nongbah ka Meghalaya ha ka por tlang bad kumjuh ruh ban pyntreikam ïa ka ‘Backlog Policy’ ha ka jingpynrung kam, ka Myntri ka tnat ka koit ka khiah, ka Kong M Ampareen Lyngdoh, ka la pynkut noh tang shiteng ïa ka jingleit jurip ïa ka Ri-Lum Garo.
Kane ka Myntri ka la leit phai noh sha Shillong hadien ka jingleit pynlong jingïalang ha Resubelpara, North Garo Hills.
Ha ka jingshisha, ka Myntri ka la dei ban don lai sngi ha Ri-Lum Garo bad ka la thmu ban pynlong jingïalang halor ka koit ka khiah ha Resubelpara, Tura bad Baghmara.
Hynrei ha ka Sngi Palei, shi kynhun ki longkmie bad kiwei ki la ïa mih paidbah ban pynpaw ïa ka jingpyrshah halor ka jingkren jong ka Myntri ha kaba ïadei bad ka jingdawa ki seng ba kynthup ïa ka ACHIK bad kiwei ban pynlong ïa ka Tura kum ka nongbah ka Meghalaya ha ka por tlang.
La khmih lynti ba ka Kong Ampareen kan wan sah ha Circuit House, Tura ha ka miet Sngi Palei, hynrei ki la don lypa ki paidbah kiba la ap ha lynti ban pynpaw ïa ka jingpyrshah halor ka jingwan jong ka sha Tura.
Dang ha ki khyndiat sngi, ki la don ki lad pathai khubor ha kine ki sngi kiba la thoh ba ka Kong Ampareen ka la ong ba ka jingdawa ban pynlong ïa ka Tura kum ka nongbah ha ka por tlang ka long ka bym ïahap satia. Ka la ong ba ka Shillong ka dei ka nongbah bad ïa ki jingdawa ban pynlong nongbah sa ha kiwei ki jaka ym dei satia ban pynsngap.
Ka jingkren jong ka Myntri ka la pynbitar lep ïa ki kynhun kiba shong shah thngan ha Tura, bad ka la pynlong ïa ki longkmie bad kiwei ban mih sha surok ha ka Sngi Palei ban pyrshah ïa ka ryngkat ka jingpyrta “Ampareen, Go Back” lane “Ampareen, Leit Phai Noh”.
Ha kawei pat ka liang, ka jingshah thngan jong ka ACHIK ka la kynjoh sha ka 11 sngi ha ka Sngi Thohdieng bad kam pat don dak satia ba kane ka kynhun kan pynsangeh ïa ka jingshah thngan.
