Shillong, Naitung 21:
Ka Supreme Court ha ka Sngi Thohdieng ka la pynsangeh ïa ka hukum jong u Deputy Commissioner ka East Jaiñtia Hills ban pynpra ïa ki karkhana thang dewïong kiba don ha East Jaiñtia Hills.
Kane ka jingpynsangeh ïa ka hukum u Deputy Commissioner ka la wan hadien ba ki nongbishar ka Supreme Court ba kynthup ïa u Justice Surya Kant bad u Justice Dipankar Datta ki la shong bishar halor ka mukotduma ba la ai da ka DRUK Fuels Limited pyrshah ïa ka sorkar Meghalaya bad kiwei pat ki mamla.
Hynrei ka Supreme Court ka la ong ruh ba u Deputy Commissioner u don ka bor ban khang ïa kita ki karkhana thang dewïong khnang ba kin ym lah ban treikam.
Na ka liang ka Supreme Court ka la ai hukum ban phah shithi sha ki mamla kiba don ha katei ka mukotduma kum ka sorkar Meghalaya bad kiwei.
Lah ban kdew ba ha kine ki sngi, ki bor distrik ka East Jaiñtia Hills bad West Khasi Hills ki la bun kam ban leit pynpra da ki tiar pynbthei ïa ki atoskhana jong ki karkhana thang dewïong be-aiñ kiba la treikam ha kine ki distrik la bun snem. Ka sorkar ka la kwah ban pynpra lut ïa baroh ki karkhana thang dewïong be-aiñ hapoh ka Sngi Palei jong kane ka taïew.
Hynrei katei ka hukum jong ka Supreme Court ban pynsangeh ïa ka jingpynpra ïa ki karkhana thang dewïong ka long beit thik tang na ka bynta kito kiba don ha East Jaiñtia Hills.
