Shillong, Naitung 21:
Ka Hill State People’s Democratic Party (HSPDP) ha ka Sngi Thohdieng ka la kren shai ba ka seng ka pyrshah ïa ka jingthmu ka Sorkar Pdeng ban wanrah ïa ka Uniform Civil Code (UCC) bad shen kan sa phah jingthoh sha ka Law Commission ka India halor kane ka bynta.
“Kumba ngi tip ba ka Sorkar India ka don jingthmu ban pyntreikam ïa ka UCC…ka seng kan sa thoh sha ka Law Commission ba ngi pyrshah ban pyntreikam ïa ka UCC ha ka Jylla jong ngi kaba dei ka Jylla kaba la ithuh kyrpang kum ka ‘Schedule Area’,” la ong u President ka HSPDP, Bah K.P. Pangniang haba kren sha ki lad pathai khubor.
U la ong ruh ba ka seng namar ba ka don ka jingsngewkhia halor ka jinglong kyrpang ka riti-dustur, jingngeit nalor kiwei-kiwei, kumta ka sngew dei ban pyrshah ïa ka jingthmu ka Sorkar India ban pyntreikam ïa ka UCC hapoh ka Jylla.
Ka seng ha kane ka sngi nalor ka UCC ka la ïakren ruh halor ka ‘Reservation Roster’ ha kaba ka la pynpaw ka jingsngewnguh ïa ka Sorkar ba ka la lah ban pyndep katto-katne ki bynta haba ïadei bad katei ka liang.
“Ngi sngewnguh ba ka MDA-2 ka la wanrah jingkylla ha ka Clause –D jong ka Office Memorandum (OM) kaba 10 tarik u Jymmang, 2022 halor ka bynta ba ïadei bad ka jingpyntreikam ïa ka ‘Reservation Roster’,” la ong u Bah Pangniang.
Haba kdew ba ka jingpyntreikam ïa ka Roster’ ha ka OM bathymmai (14 tarik u Jylliew, 2023) ka long nangne shakhmat, u la ong ba ka seng ka pynpaw ka jingsngewnguh ïa ka Sorkar kaba la shim ïa ka jingai jingmut kaba la mih na ka jingïalang jong ki seng saiñ pyrthei ka Jylla kaba la long ha u bnai Jymmang.
Ha kajuh ka por, haba pynsngew ba ka Sorkar ha ka 27 tarik u Jylliew, 2023 ka la pynbeit ïa ka OM jong u snem 1974, u President u la ïathuh ba ka Sorkar ha ka jingïalang ka Kynhun Myntri ka la shim ïa ka rai bad shen kan sa pynmih jingpynbna halor katei ka bynta.
“Ka kam kaba dang sah ban pyndep katkum ka jingbthah ka Chairperson ka komiti jong baroh ki seng saiñ pyrthei halor ka ‘Reservation Roster’ ka long ban wanrah ïa ki jingai jingmut sha ka Sorkar. Ki dang don ki jingai jngmut kiba ngi ïoh pdiang na ki para dkhot kiba ngi dang hap pynbeit kham bha. Ka seng ka sah sa tang katto-katne shuwa ban aiti ïa ki jingai jingmut sha ka Sorkar Jylla,” u la ong.
Shuh shuh u la bynrap, “Ngi kwah ban da khmih bniah bha shuh-shuh nalor kiei kiba ngi la ïakren ha shuwa ban ngin aiti ïa ki jingai jingmut sha ka Sorkar,” la ong utei u nongïalam.
